Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 510 Hüküm no: 631 Orijinal metin no: [97a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şahbaz bt. Abdullah’ın menzil yarı hissesini kocası Ömer Çelebi b. Şaban’a satması Medîne-i Hazret-i Ebâ Eyyûb el-Ensârî’de Sofular mahallesi sâkinelerinden Şahbaz bt. Abdullah nâm hâtun meclis-i şer‘-i şerîfde zevci işbu râfi‘ü’l-kitâb Ömer Çelebi b. Şaban mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup mahalle-i mezbûrede vâki‘ bir tarafı Ömer Beşe mülkü ve bir tarafı Receb Beşe mülkü ve bir tarafı Yusuf Çelebi mülkü ve bir tarafı tarîk-i hâs ile mahdûd bir bâb fevkānî ve bir bâb tahtânî odaları ve Ömer Beşe ile müşterek bi’r-i mâ ve kenîfi müştemil mülk menzilimin nısfını, zevcim mezbûr Ömer Çelebi’ye dört bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ve temlîk edip ol dahi minvâl-i muharrer üzre iştirâ ve tesellüm ve temellük ve kabûl ve kabz eyledikden sonra semeni olan meblağ-ı mezbûr dört bin akçeyi zevcim mezbûr Ömer Çelebi yedinden bi’t-tamâm ahz ve kabz eyledim ba‘de’l-yevm menzil-i mahdûd-ı mezkûrun nısfında vechen mine’l-vücûh alâka ve medhalim yokdur mezbûr Ömer Çelebi’nin mülk-i müşterâsı olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min şehri Ramazâni’l-mübârek li sene ihdâ ve tis‘în ve elf. Şuhûdü’l-hâl: Seydî Beşe b. Hüseyin, Ali Beşe b. Mehmed, Mustafa b. Süleyman, Halil b. Mehmed, Ömer Beşe b. Mehmed.