Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 512 Hüküm no: 634 Orijinal metin no: [97a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Musa Bey’in kölesi Yusuf b. Abdullah’ı azat etmesi Düstûr-ı mükerrem müşîr-i müfahham vezîr-i sânî Mustafa Paşa hazretlerinin mataracıbaşısı olan fahrü’l-akrân Musa Bey b. ( ) tarafından akd-i âti’l-beyânı ikrâra vekîl olup İbrahim Çelebi b. Mahmud ve Şâhin Bey b. Abdullah nâm kimesneler şehâdetleriyle şer‘an vekâleti sâbite olan Ahmed Çelebi b. Mehmed meclis-i şer‘-i şerîfde müvekkil-i mezbûrun kendiye rıkkını mu‘terif işbu orta boylu, açık kaşlı, kara gözlü Rûsiyyü’l-asl bâ‘isü’l-kitâb Yusuf b. Abdullah mahzarında bi’l-vekâle ikrâr ve takrîr-i kelâm edip müvekkil-i mezbûr Musa Bey mevsûf-ı mezkûr Yusuf’u cemî‘ malından ifrâz edip hasbeten lillâhi te‘âlâ ve hasbeten li rûhi resûlihi’l-mu‘allâ i‘tâk ve tahrîr-i zümre-i ahrâr-ı asliyyîne idrâc ve ilhâk eyledim ba‘de’l-yevm mevsûf-ı merkūm Yusuf sâir ahrâr-ı asliyyîn gibi hür olup mevâlî-i utekā için sâbit olan hakk-ı velâdan gayrı üzerinde hakkım kalmadı dedi dedikde mâ cerâ bi’t-taleb ketb olundu. Fî selhi şehri Ramazâni’l-mübârek li sene ihdâ ve tis‘în ve elf. Şuhûdü’l-hâl: İbrahim Beşe b. ( ) Tüfenkçi, Ahmed Çelebi b. ( ), Mahmud Beşe b. Süleyman Beşe, Halil Ağa, Mehmed Eyüb, Mehmed Çelebi, Abdülbâkī Efendi.