Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 512 Hüküm no: 635 Orijinal metin no: [97b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Katledilen Bostancı Yorgi ile oğlu Nikola’nın cesetlerinin muayenesi ve Burgaz köyü ahalisinden vârislerinin davacı olmadığı Havâss-ı Aliyye kazâsına tâbi‘ Burgaz nâm karye ahâlîsinden Codar v. Pandazi ve Üskülî v. Franko ve Hristo v. Aviro ve Manol v. Yorgi ve Foti v. Hristo ve Yani v. Dimitri ve Mihal v. Riz ve Yorgi v. Aleksandri nâm zimmîler meclis-i şer‘-i şerîfde her biri takrîr-i kelâm edip yine karye-i mezbûre ahâlîsinden olup karye-i mezbûre kurbunda Fındıklı bostanı demekle ma‘rûf bostanda bostancı olan Yorgi v. Yani ve sulbî kebîr oğlu Nikola nâm zimmîler işbu târih-i kitâba gecesi zebh olunmuş bulunmağın hâlâ kıbel-i şer‘den üzerlerine varılıp vâki‘ hâl ba‘de’l-keşf ve’l-mu‘âyene ketb ve tahrîr olunmak matlûbumuzdur dediklerinde savb-ı şer‘-i hatîrden mevlânâ Mustafa Efendi b. İsmail irsâl olunup ol dahi hâssa bostancı hasekilerinden Ali Ağa b. Pîrî ve sâir zeyl-i kitâbda muharrerü’l-esâmî müslimîn ile maktûlân-ı merkūmânın üzerlerine varıp keşf ve nazar olundukda fi’l-hakīka mersûmân Yorgi ve Nikola mezbûhan mürd olunduğunu mu‘âyene ve müşâhede eylediklerinden sonra hâlik-i merkūm Yorgi’nin zevcesi Maryero bt. İstati ve sulbî kebîr âhar oğlu Labno nâm zimmî meclis-i ma‘kūd-ı mezkûrda her biri takrîr-i kelâm edip mûrisimiz hâlikân-ı mezbûrân Yorgi ve Nikola’nın dem ve diyetine müte‘allika zikr olunan Burgaz karyesi ahâlîsiyle min ba‘d da‘vâ ve nizâ‘ımız yokdur dediklerinde vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Yusuf b. Abdullah ve Ahmed Bey ile meclis-i şer‘a gelip her biri alâ vukū‘ihi inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sânî min Şevvâli’l-mükerrem li sene ihdâ ve tis‘în ve elf. Şuhûdü’l-hâl: Mustafa Efendi b. ( ) el-Hatîb, Ahmed Efendi b. Ali el-İmâm, Ahmed b. Hasan, Halil b. Sefer, Mehmed b. Eyüb, Ali b. Abdullah, İbrahim b. Şaban.