Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 515 Hüküm no: 638 Orijinal metin no: [98a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ailesini terkeden Yusuf b. Abdullah’a karısı Hatice ve küçük kızı Emine için nafaka takdiri Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Aşçıbaşı mahallesi sâkinelerinden işbu râfi‘atü’l-kitâb Hatice bt. Mustafa nâm hâtun meclis-i şer‘-i şerîfde takrîr-i kelâm ve ta‘bîr ani’l-merâm edip zevcim olup gāib ani’l-meclis olan Yusuf b. Abdullah nâm kimesne beni bilâ-nafaka terk ve diyâr-ı âhara firâr edip gitmekle mezbûr Yusuf’un firâşından mütevellide Emine nâm sagīre ile benim için nafaka ve kisve-bahâ takdîr olunmak matlûbumdur dedikde hâkim-i muvakki‘-i sadr-ı kitâb tûbâ-lehû ve hüsnü me’âb hazretleri dahi gāib-i mezbûr Yusuf cins-i nafakadan bir şey terk etmediğine ba‘de’l-istihlâf merkūme Hatice yemîn billâhi’l-aliyyi’l-a‘lâ eyledikden sonra mezbûr Hatice ile sagīre-i mezbûrenin nafaka ve kisve-bahâsı için gāib-i merkūm üzerine târih-i kitâbdan yevmî on beş akçe farz ve takdîr edip meblağ-ı mefrûz-ı mezkûrı harc ve sarfa ve lede’l-hâce istidâneye ve vakt-i zaferde gāib-i mezbûr Yusuf üzerine rücû‘a mezbûre Hatice’ye izin birle mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min Şevvâli’l-mükerrem li sene ihdâ ve tis‘în ve elf. Şuhûdü’l-hâl: Sâlih Efendi b. Mehmed el-Müderris, Mustafa Çelebi b. Mehmed, Nasuh Efendi b. Abdullah, Ahmed b. Veli, Ali b. Bâli, Hüseyin Çelebi b. Mehmed, Mehmed b. Eyüb.