Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 515 Hüküm no: 637 Orijinal metin no: [98a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kaçanoğlu Mehmed’in Mehmed b. Abdullah’daki alacağını tahsil ettiği Havâss-ı Aliyye kazâsına tâbi‘ nâhiye-i Terkos’da nefs-i Terkos karyesi sükkânından Kaçanoğlu demekle ma‘rûf Mehmed nâm kimesne meclis-i şer‘-i şerîf-i enverde yine karye-i merkūmede sâkin işbu râfi‘ü’l-kitâb Şumlu Mehmed b. Abdullah tarafından meblağ-ı âti’l-beyânı edâya vekîl-i müsecceli olan Çontuk Mehmed b. Ahmed nâm kimesne mahzarında tav‘an ikrâr-ı tâm ve takrîr-i kelâm edip müvekkil-i mezbûr Şumlu Mehmed zimmetinde cihet-i deyn-i şer‘îden yirmi beş esedî guruş hakkım olmağla meblağ-ı mezbûru Çontuk Mehmed vekâleti hasebiyle bana bi’t-tamâm def‘ ve teslîm ben dahi ahz ve kabz eyledim ba‘de’l-yevm meblağ-ı mezbûr yirmi beş esedî guruşdan müvekkil-i merkūm Şumlu Mehmed zimmetinde bir akçe ve bir habbe hakkım kalmadı meblağ-ı mezkûra müte‘allika da‘vâdan müvekkil-i mezbûrun zimmetini ibrâ-i âm ile ibrâ ve iskāt eyledim dedikde gıbbe’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî min Şevvâli’l-mükerrem li sene ihdâ ve tis‘în ve elf. Şuhûdü’l-hâl: Hüseyin Efendi b. Ahmed, Nasuh Efendi b. Abdüsselâm, Mehmed b. Eyüb, Mehmed b. Mahmud.