Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 516 Hüküm no: 640 Orijinal metin no: [98a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Serkis v. Kazar’ın miras hisselerini tahsil ettiği Havâss-ı Aliyye kazâsına tâbi‘ kasaba-i Hasköy’de Abdüsselâm mahallesi sâkinlerinden iken bundan akdem hâlike olan Caniki bt. Bedros nâm nasrâniyyenin verâseti zevci Serkis v. Kazar nâm Ermeni ile anası Sare bt. Kalaylan nâm nasrâniyye ve sadrî sagīr oğlu Kazar’a münhasıra olduğu şer‘an zâhir ve mütehakkik oldukdan sonra sagīr-i mezbûrun babası ve kıbel-i şer‘den mansûb vasîsi olan merkūm Serkis meclis-i şer‘-i şerîfde işbu râfi‘ü’r-rakīm mersûme Sare muvâcehesinde asâleten ve vesâyeten ikrâr-ı tâm ve takrîr-i kelâm edip zevcem hâlike-i mezbûrenin babası olup kendiden mukaddem mürd olan Bedros v. Garabet nâm hâlikin verâseti zevce-i metrûkesi merkūme Sare ile sulbî kebîr oğlu Ohan ve sulbiye kebîre kızları Kıymet ve Beyzâde ve zevcem hâlike-i mersûme Caniki’ye münhasıra olmağla kayınatam hâlik-i merkūm Bedros’un terekesinden vâzı‘atü’l-yed olan zevcesi mersûme Sare zevci hâlik-i mezbûr Bedros’un terekesinden zevcem hâlike-i merkūme Caniki’nin hisse-i irsiyyesine isâbet eden hakkından benim hisse-i şer‘iyyem ile [98b] sagīr-i merkūmun hissesine isâbet eden yirmi esedî guruş hakkımızı asâlet ve vesâyetim hasebiyle mezbûre Sare yedinden bi’t-tamâm ve’l-kemâl ahz ve kabz edip hâlik-i merkūm Bedros’un terekesinden hâlike-i mezbûre Caniki’nin hisse-i irsiyyesine isâbet eden hakkından hissemize müte‘allika âmme-i da‘vâdan mersûme Sare’nin zimmetini ibrâ-i âm ile ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min Şevvâli’l-mükerrem li sene ihdâ ve tis‘în ve elf. Şuhûdü’l-hâl: Osman Beşe, Mehmed b. Eyüb, Mehmed b. Mahmud, Yusuf b. Abdullah, İstefanos [v.] Kazar, Abraham [v.] Körkör, Safir [v.] Garabet, Ohan [v.] Bedros.