Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 517 Hüküm no: 641 Orijinal metin no: [98b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ahmed’in evini Mehmed Çelebi b. Arslan’a satması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Evlice Baba mahallesi sükkânından Mehmed b. Ahmed nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb diğer Mehmed Çelebi b. Arslan nâm kimesne mahzarında tav‘an ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olup mahalle-i mezkûrede vâki‘ bir tarafdan İvaz Beşe b. Ali mülkü ve bir tarafdan ba‘zan Uzun Mehmed mülkü ve ba‘zan Musli Beşe mülkü ve ba‘zan kebabî Haydar mülkü ve bir tarafı bayır ve bir tarafı tarîk-i âm ile mahdûd iki bâb tahtânî oda ve mezbûr İvaz Beşe ile müşterek bi’r-i mâ ve bir köşk ve zât-ı eşcâr-ı müsmire ve gayr-ı müsmire bahçeyi müştemil mülk menzilimi bi cümleti’t-tevâbi‘ ve’l-levâhık mezbûr diğer Mehmed Çelebi’ye sekiz bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ve temlîk edip ol dahi minvâl-i muharrer üzre iştirâ ve tesellüm ve temellük ve kabûl eyledikden sonra semeni olan meblağ-ı mezbûr sekiz bin akçeyi merkūm diğer Mehmed Çelebi yedinden bi’t-tamâm ve’l-kemâl ahz u kabz eyledim ba‘de’l-yevm menzil-i mahdûd-ı mezkûrda vechen mine’l-vücûh alâkam kalmadı mezbûr Mehmed Çelebi’nin mülk-i müşterâsı olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis min Şevvâli’l-mükerrem li sene ihdâ ve tis‘în ve elf. Şuhûdü’l-hâl: Mehmed Efendi b. Ahmed el-İmâm, Abdullah Halîfe b. Abdullah el-Müezzin, İvaz Beşe b. Ali, Sadık b. Ahmed, Yusuf b. Ahmed, İbrahim Beşe b. Hüdâverdi, Mehmed b. Eyüb, Hüseyin Efendi b. Ahmed, Mehmed b. Mahmud.