Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 526 Hüküm no: 656 Orijinal metin no: [100b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rıdvan b. Abdullah’ın azat edilmiş olduğunun anlaşılması İşbu orta boylu açık kaşlı kara gözlü mültehî Gürciyyü’l-asl bâ‘isü’l-kitâb Rıdvan b. Abdullah meclis-i şer‘-i hatîr-i lâzımü’t-tevkīrde medîne-i Hazret-i Ebâ Eyyûb-i Ensârî’de Mehmed Bey es-Selâmi mahallesi sükkânından olup bundan akdem tarîk-i hacc-ı şerîfde vefât eden Hüseyin Çelebi b. Gülümşah nâm müteveffânın sulbî oğulları Mustafa ve Abdürrezzak nâm sagīrlerin tesviye-i umûrları için kıbel-i şer‘den mansûb vasîleri olan İbrahim Çelebi b. el-Hâc Bayram mahzarında üzerine da‘vâ ve takrîr-i kelâm edip ben müteveffâ-yı mezbûr Hüseyin Çelebi’nin abd-i memlûkü olup hâl-i hayât ve kemâl-i akl ve sıhhatinde cemî‘ malından ifrâz ve âzâd edip zümre-i ahrâr-ı asliyyîne idrâc ve ilhâk eyleyip ben sâir ahrâr-ı asliyyîn gibi hür olmuşiken vasiyy-i mezbûr İbrahim Çelebi bana rıkk olmak [üzre] bi gayri hakkın vaz‘-ı yed eder suâl olunup sebîlim tahliyye ve vasiyy-i mezbûrun kasr-ı yedine tenbîh olunmak matlûbumdur dedikde gıbbe’s-suâl vasiyy-i mezbûr İbrahim Çelebi cevâbında müdde‘î-i merkūm Rıdvan ber vech-i muharrer vaz‘-ı yedini ikrâr lâkin müdde‘î-i merkūm müteveffâ-yı mezbûr hâl-i hâyatında i‘tâkını inkâr edicek müdde‘î-i merkūm Rıdvan’dan da‘vâsını mübeyyine beyyine taleb olundukda udûl-i ricâlden olup yine mahalle-i merkūme sâkinlerinden Mehmed Çelebi b. İbrahim ve Râmî Mehmed Efendi b. Hasan nâm kimesneler li ecli’ş-şehâde makām-ı kazâya hâzırân olup istişhâd olunduklarında fi’l-hakīka müteveffâ-yı mezbûr hâl-i hayât ve kemâl-i akl ve sıhhatinde müdde‘î-i merkūm Rıdvan’ı cemî‘ malından ifrâz ve (…) edip sâir ahrâr-ı asliyyîn zümresine idrâc ve ilhâk eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylelediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle merkūm Rıdvan’ın ıtkına ba‘de’l-hükm vasiyy-i mezbûrun kasr-ı yedine tenbîh birle mâ vaka‘a bi’t-taleb ketb olundu. Fi’l-yevmi’t-tâsi‘ min Şevvâli’l-mükerrem li sene ihdâ ve tis‘în ve elf. Şuhûdü’l-hâl: Abdurrahman Çelebi b. Mehmed, Nasuh Efendi b. Abdüsselâm, Mehmed b. Eyüb, Mehmed b. Mahmud, Yusuf b. Abdullah, Hüseyin b. Ali.