Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 525 Hüküm no: 655 Orijinal metin no: [100b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstiracva v. Kosta’nın evini Kominos v. İstemad’a satması Medîne-i Gelibolu kazâsı’na tâbi‘ Maydos nâm karye ahâlîsinden İstiracva v. Kosta nâm zimmî meclis-i şer‘-i şerîfde işbu râfi‘ü’r-rakīm Kominos v. İstemad nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup karye-i mezbûrede vâki‘ bir tarafı müşterî-i mezbûrun âhar mülkü ve bir tarafı Yani nâm zimmî mülkü ve bir tarafı Panat nâm zimmî mülkü ve bir tarafı tarîk-i âm ile mahdûd bir bâb tahtânî odayı müştemil mülk menzilimi cemî‘ tevâbi‘i ile mezbûr Kominos’a on esedî guruşa bey‘-i bâtt-ı sahîh-i şer‘î ile bey‘ ve temlîk edip ol dahi minvâl-i muharrer üzre iştirâ ve temellük ve kabûl eyledikden sonra semeni olan meblağ-ı mezbûr on esedî guruşu mezbûr Kominos yedinden bi’t-tamâm ahz ve kabz eyledim ba‘de’l-yevm menzil-i mahdûd-ı mezkûrda alâka ve medhalim yokdur, mezbûr Kominos’un mülk-i müşterâsı olmuşdur keyfe mâ yeşâ’ mahallinde zabt ve tasarrufa müşterî-i mezbûru taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-âşir min Şevvâli’l-mükerrem sene ihdâ ve tis‘în ve elf. Şuhûdü’l-hâl: Mehmed b. Eyüb, Hüseyin b. Ali. Yusuf b. Abdullah, Mehmed b. Mahmud, Panayot [v.] Aleksi, Mihal [v.] Kostanti, Panayot [v.] Yani, Kiryazi [v.] Manol, Mitre [v.] Anesti.