Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 532 Hüküm no: 664 Orijinal metin no: [101b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Yusuf’un boşandığı kocası Osman b. Hasan’ın zimmetini ibra etmesi Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-[de] Aşçıbaşı mahallesi sâkinelerinden Âişe bt. Yusuf nâm hâtun meclis-i şer‘-i hatîr-i lâzımü’t-tevkīrde zevc-i mutallıkı işbu râfi‘ü’l-kitâb Osman b. Hasan nâm kimesne mahzarında bi tav‘ihâ ikrâr-ı tâm ve takrîr-i kelâm edip mezbûr Osman zevcim olup hâlâ beni tatlîk etmekle zimmetinde mütekarrir ve ma‘kūdun-aleyh olan iki bin akçe mehr-i müeccel hakkım ile nafaka-i iddet-i mu‘ayyenem ile süknâm mukābelesinde beş yüz akçe dahi cem‘an iki bin beş yüz akçe hakkımı tamâmen bana def‘ ve teslîm ben dahi ahz ve kabz edip bâkī zimmetinde bir akçe ve bir habbe hakkım kalmadı dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min Şevvâli’l-mükerrem li sene ihdâ ve tis‘în ve elf. Şuhûdü’l-hâl: Mustafa Çelebi b. İsmail, Ahmed b. Ali, Hüseyin Beşe b. ( ) Çukadâr, Mehmed b. Eyüb, Hasan b. Abdullah.