Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 533 Hüküm no: 665 Orijinal metin no: [102a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ömer Beşe b. Eyüb’ün bostancılar yiğitbaşılığına tayin olunması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de bostancılar kethüdâsı olan Mustafa Çelebi b. Mehmed nâm kimesne meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr ani’l-merâm edip medîne-i mezbûrede vâki‘ bostancılar yiğitbaşısı olmağla taraf-ı Saltanat-ı aliyye’den tekâlîf vâkı‘a oldukda cem‘ ve tahsîl edip kabzına memûr olanlara îsâl ve teslîme bana mu‘âvenet eder bir âdem lâzım ve mühim olunduğundan mâ‘adâ bostancıların sâir umûru için yiğitbaşı nasb ve ta‘yîn olunmak matlûbumdur, işbu hâzır bi’l-meclis Ömer Beşe b. Eyüb nâm kimesne mahal ve müstahık ve yiğitbaşılık umûrunun her vechile uhdesinden gelmeğe kādirdir dedikde hâkim-i muvakki‘-i sadr-ı kitâb tûbâ-leh ve hüsnü me’âb hazretleri dahi mezbûr Ömer Beşe’nin tâife-i merkūme üzerlerine yiğitbaşı nasb ve ta‘yîn eyledikde ol dahi hizmet-i mezbûreyi kabûl ve levâzımını edâya ta‘ahhüd ve iltizâm etmeğin mâ hüve’l-vâki‘ alâ hâze’l-minvâl gıbbe’t-taleb ketb olundu. Fi’l-yevmi’l-hâmis aşer [min Şevvâli’l-mükerrem] fi’s-seneti’l-mezbûre. Şuhûdü’l-hâl: Haseki Mustafa Ağa b. Ahmed, Nasuh Efendi b. Abdüsselâm, Hüseyin Beşe b. Receb, Hüseyin Çelebi b. Ali.