Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 535 Hüküm no: 668 Orijinal metin no: [102a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Subaşı el-Hâc Yusuf’un beytülmâle ait olduğunu iddia ettiği cariyelerin azat edildiğinin anlaşılması İşbu râfi‘atü’l-kitâb orta boylu açık kaşlı sol elinin sırça parmağı geç Rûsiyyetü’l-asl Timurhan bt. Abdullah meclis-i şer‘-i şerîfde mahmiye-i İstanbul’da gümrük emîni olan umdetü’l-emâcid ve’l-ekârim Hüseyin Ağa tarafından beytülmâl-i âmme ve hâssa kabzına memûr olup mahmiye-i mezkûre hısnı ebvâbından Edirnekapısı hâricinde bi’l-fi‘l subaşı olan el-Hâc Yusuf b. Abdullah mahzarında üzerine da‘vâ ve takrîr-i kelâm edip mahmiye-i mezbûre hısnı ebvâbından Yenikapı hâricinde Emânî Çelebi mahallesi sükkânından iken bundan akdem vefât eden el-Hâc Mustafa b. Musa’nın ben ve sadriye sagīre kızım Şahbaz mukaddemâ câriye-i memlûkesi olup bin seksen sekiz şehr-i Recebü’l-mürecceb’de cemî‘ malından ifrâz ve âzâd ve zümre-i harâir-i asliyyâta idrâc ve ilhâk edip ben ve kızım sâir harâir-i asliyyât gibi hür olmuşiken mezbûr el-Hâc Yusuf bi gayri hakkın bana ve kızıma vaz‘[ı-yed] eder suâl olunup sebîlimiz tahliyye ve kasr-ı yedine tenbîh olunmak matlûbumdur dedikde gıbbe’s-suâl merkūm subaşı el-Hâc Yusuf zikr olunan câriyelere vaz‘-ı yedini ikrâr lâkin müteveffâ-yı [mezbûr] târih-i mezkûrda ber vech-i muharrer i‘tâk ettiğini inkâr edicek müdde‘iyye-i merkūme Timurhan’dan da‘vâsını mübeyyine beyyine taleb olundukda udûl-i ricâl-i ahrârdan olup mahalle-i [mezbûre] sükkânından Ali Çelebi b. Abdünnebi ve Cafer b. Hasan ve Mehmed b. Receb ve Mehmed b. Memi nâm kimesneler li ecli’ş-şehâde makām-ı kazâda hâzırûn olup istişhâd olunduklarında fi’l-hakīka müteveffâ-yı mezbûr el-Hâc Mustafa hâl-i hayâtında târih-i mezkûrda mevsûfe-i merkūme Timurhan ile kızı sagīr-i mezbûre Şahbaz’ı bizim huzûrumuzda cemî‘ malından ifrâz ve zümre-i harâir-i asliyyâta idrâc ve ilhâk etmişdir biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylelediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle merkūmetân Timurhan ve Şahbaz’ın ıtkına ba‘de’l-hükm [merkūm Ali’nin] kasr-ı yedine tenbîh birle mâ vaka‘a bi’t-taleb ketb olundu. Fi’l-yevmi’s-sâbi‘ aşer min Şevvâli’l-mükerrem [102b] [li] sene ihdâ ve tis‘în ve elf. Şuhûdü’l-hâl: El-Hâc Mehmed Efendi b. Hasan, Mustafa Efendi b. Ahmed el-İmâm, Mehmed Çelebi b. Osman, Ali Efendi b. Hasan, Mehmed Bey b. Ahmed, Muharrem Çelebi b. Muharrem, Ali Beşe b. Durmuş, Ali b. Abdünnebi ve gayruhüm.