Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 534 Hüküm no: 667 Orijinal metin no: [102a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Beytülmâl emini subaşı el-Hâc Yusuf’un beytülmâle ait miras hissesi davasının reddi Mahmiye-i İstanbul hısnı ebvâbından Edirnekapısı hâricinde subaşı olup gümrük emîni olan umdetü’l-emâcid ve’l-ekârim Hüseyin Ağa tarafından beytülmâl-i âmme ve hâssa kabzına memûr olan el-Hâc Yusuf b. Abdullah nâm kimesne mahfil-i kazâda işbu râfi‘ü’l-kitâb Ali Beşe b. Durmuş nâm kimesne mahzarında üzerine da‘vâ ve takrîr-i kelâm edip mahmiye-i mezkûre hısnı ebvâbından Yenikapı hâricinde Emânî Çelebi mahallesi sükkânından iken bundan akdem vefât eden el-Hâc Mustafa b. Musa nâm müteveffânın zâhirde vâris-i ma‘rûfu olmamağla terekesinin rub‘u zevcesi Âişe bt. Durmuş nâm hâtuna ve selâse erbâ‘ı cânib-i beytülmâle âid olmağla tereke-i müteveffâ-yı mezbûrdan elli esedî guruşa bi gayri hakkın vaz‘-ı yed edip ahz ve kabz etmişdir hâlâ suâl olunup takrîr-i kelâm ve ta‘bîr ani’l-merâm edip tahrîr ve meblağ-ı mezkûrdan taraf-ı beytülmâle âid olan beş bin dört yüz akçeyi alıverilmek matlûbumdur dedikde gıbbe’s-suâl mezbûr Ali Beşe cevâbında fi’l-hakīka tereke-i müteveffâ-yı mezkûrdan meblağ-ı mezbûru ber vech-i muharrer ahz ve kabz eylediğim mukarrerdir lâkin müteveffâ-yı mezbûr hâl-i hayâtında huzûr-ı müslimînde meblağ-ı mezkûru malından ifrâz edip yedime def‘ ve teslîmden sonra meblağ-ı mezbûru techîz ve tekfînine harc ve sarf eyle deyû beni vasiyy-i muhtâr nasb ve ta‘yîn ve ihtiyâr eyledikde ben dahi vech-i muharrer üzre kabûl ve merâsimini edâya ta‘ahhüd ve iltizâm etmişidim deyicek isre’l-istintâk ve akībe’l-inkâr ve gıbbe talebi’l-beyyine udûl-i ricâl-i ahrârdan olup mahalle-i mezbûre sükkânından Mustafa Efendi b. Ahmed el-İmâm ve İbrahim Çelebi b. Hüseyin nâm kimesneler li ecli’ş-şehâde makām-ı kazâya hâzırân olup istişhâd olunduklarında fi’l-vâki‘ müteveffâ-yı mezbûr el-Hâc Mustafa hâl-i hayâtında malından meblağ-ı mezbûr elli esedî guruşu ifrâz edip bizim huzûrumuzda mezbûr Ali Beşe yedine def‘ ve teslîmden sonra hîn-i fevtimde techîz ve tekfînime harc ve sarf eyle deyû vasiyy-i muhtâr nasb ve ta‘yîn ve ihtiyâr eyledikde ol dahi vesâyet-i mezkûreyi kabûl ve merâsimini edâya ta‘ahhüd ve iltizâm eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylelediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle ba‘de’l-hükm merkūm subaşı-i mezbûr Ali ile bî-vech mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’s-sâbi‘ aşer min Şevvâli’l-mükerrem li sene ihdâ ve tis‘în ve elf. Şuhûdü’l-hâl: Hüseyin b. Ali, Mehmed b. Eyüb, Mehmed b. Mahmud, Ali b. Abdullah, Yusuf b. Abdullah.