Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 536 Hüküm no: 670 Orijinal metin no: [102b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Evlatlık edinilen Âişe için nafaka takdiri Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Kara Süleyman Çelebi mahallesi sükkânından işbu [bâ‘isü’l]-kitâb Ali Çelebi b. Mehmed nâm kimesne meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr ani’l-merâm edip işbu hâzıre bi’l-meclis Âişe nâm sagīreyi babası gāib ani’l-meclis Mehmed b. ( ) nâm kimesne bundan akdem bi tarîki’t-tebennî ve’ş-şart bana teslîm ben dahi kabz ve tesellüm etmişidim hâlâ sagīre-i mezbûreye kadr-i kifâye nafaka ve kisve-bahâ takdîr olunması matlûbumdur dedikde hâkim-i muvakki‘-i sadr-ı kitâb tûbâ-leh ve hüsnü me’âb hazretleri dahi sagīre-i mezbûre Âişe’nin nafaka ve kisve-bahâsı için târih-i kitâbdan yevmî beşer akçe farz ve takdîr eyleyip meblağ-ı mefrûz-ı mezkûru harc ve sarfa ve lede’l-hâce istidâneye ve vakt-i zaferde men lehü’t-taleb üzerine rücû‘a izin birle mâ cerâ bi’t-taleb ketb olundu. Fi’l-yevmi’s-sânî [min Şevvâli’l-mükerrem] fi’s-seneti’l-mezbûre. Şuhûdü’l-hâl: Şaban Bey b. Mustafa, Yusuf Bey b. Osman, Şaban Beşe b. Mehmed, İbrahim Beşe b. Ahmed, Abdurrahman Beşe b. Durmuş, Mustafa Çelebi b. Süleyman.