Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 536 Hüküm no: 671 Orijinal metin no: [102b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmail Efendi b. Rüstem’in vârislerinin Miftah ağası Mustafa Ağa’ya kendi mülkleri gibi sattıkları evin vakfa ait olması üzerine parayı iade ettikleri Düstûr-ı mükerrem müşîr-i müfahham vezîr-i sânî müsâhib-i şehriyârî devletlü ve sa‘âdetlü Mustafa Paşa hazretlerinin miftâh ağası olup işbu kitâb-ı sıhhat-nisâbın sâhibi olan Fahrü’l-emâsil ve’l-akrân Mustafa Ağa b. Piyâle tarafından husûs-ı âti’l-beyâna vekîl olup hasm-ı câhid-i şer‘î mahzarında Musa Bey b. Mehmed ve Abdülganî b. Hüseyin şehâdetleriyle şer‘an vekâleti sâbite olan Ahmed Ağa b. Oruc meclis-i şer‘-i hatîr-i lâzımü’t-tevkīrde medîne-i Hazret-i Ebâ Eyyûb-i Ensârî’de Câmi‘-i Kebîr mahallesi sükkânından iken bundan akdem vefât eden İsmail Efendi b. Rüstem’in verâseti zevce-i metrûkesi Rahime bt. Muharrem nâm hâtuna ve sulbî kebîr oğulları Abdullah ve Süleyman ve İbrahim ile kebîre kızı Âişe Hâtun’a münhasıra olduğu lede’ş-şer‘i’l-mutahhar zâhir ve mütehakkik oldukdan sonra mezbûr Abdullah ve Süleyman ve İbrahim ve Âişe mahzarlarında bi’l-vekâle üzerlerine da‘vâ ve takrîr-i kelâm edip mahalle-i mezbûrede vâki‘ bir tarafdan Kettânî nâm sâhibü’l-hayrın vakf odaları ve bir tarafdan Ferhad Paşa türbesi ve bir tarafdan bozahâne dükkânı demekle ma‘rûf dükkân ve bir tarafdan tarîk-i âm ile mahdûd menzili bin doksan senesi şehr-i Ramazâni’l-mübâreki’nde verese-i merkūme mûrisleri müteveffâ-yı mezbûr İsmail Efendi’nin hayâtında mülkü ba‘de vefâtihî irsen kendilere isâbet ve intikāl etmiş mülk-i mevrûsları olmak üzre müvekkilim mezbûr Mustafa Ağa’ya seksen bin akçeye bey‘ ve teslîm ve kabz-ı semen etmişlerdi hâlâ menzil-i mezkûr vakf olduğu şuhûd-ı udûlle huzûr-ı hâkimde isbât olunmağla meblağ-ı mezkûr seksen bin akçeyi vekâlet-i mahkiyem hasebiyle mezbûrûn Abdullah ve Süleyman ve İbrahim ve Âişe’den taleb ederim suâl olunup takrîrleri tahrîr ve edâsına tenbîh olunmak matlûbumdur dedikde gıbbe’s-suâl merkūmûn Abdullah ve Süleyman ve İbrahim ve Âişe cevâblarında fi’l-hakīka hâl-i kaziyye vekîl-i mezbûr Ahmed Ağa’nın bâlâda bast ve tafsîl eylediği minvâl üzre olmuşdur deyû her biri tav‘an ikrâr ve i‘tirâf etmeğin alâ mûcibi ikrârihim meblağ-ı mezkûr seksen bin akçeyi vekîl-i mezbûr Ahmed Ağa’ya edâya mezbûrûn Abdullah ve Süleyman ve İbrahim ve Âişe’ye tenbîh birle mâ vaka‘a bi’t-taleb ketb olundu. Fi’l-yevmi’l-âşir min Şevvâli’l-mükerrem fi’s-seneti’l-mezbûre. Şuhûdü’l-hâl: Mehmed Çelebi b. Mustafa tâbi‘-i Hanzâde, Abdülganî Çelebi b. Hüseyin, el-Hâc Abdullah b. Şaban, Şeyh Mehmed Mevlevî, es-Seyyid Mehmed Efendi b. Mustafa, Musa Beşe b. Mehmed el-Mübâşir, Mustafa Çelebi b. ( ) Kâtib, Mustafa b. Nasuh, câbî Mehmed b. Ömer, câbî Mehmed b. Mehmed, Mehmed Çelebi b. Mustafa.