Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 541 Hüküm no: 676 Orijinal metin no: [103b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Terkos’a bağlı Ayazma köyü ahalisinden kanunda öngörülenden fazla vergi alınmamasına dair ferman kaydı Kıdvetü’n-nüvvâbi’l-müteşerri‘în Terkos nâhiyesinde nâibü’ş-şer‘ olan mevlânâ ( ) -zîde ilmühû- tevkī‘-i refî‘-i hümâyûn vâsıl olucak ma‘lûm ola ki nâhiye-i mezbûra tâbi‘ dârendegân-ı fermân-ı hümâyûn Ayazma nâm karye ahâlîsi südde-i sa‘âdetime arzuhâl edip bunlar karyeleri toprağında zirâ‘atleriyle hâsıl eyledikleri mahsûllerinde müteveccih olan öşürlerin ve her sene otu biçilir çayırlarında dahi öşre mu‘âdil mukāta‘aların [edâ] edip kusûrları yoğiken karyeleri zâbitleri kanâ‘at etmeyip mücerred siz de yerlerinizin otluğun âhara füruht edersiniz ol takdîrce tekrâr öşr ve resm nâmına akçe verin deyû dahl ve rencîde eylediklerinden mâ‘adâ müft ve meccânen yem ve yemek ve sâir me’kûlât talebiyle fukarâya te‘addî ve rencîde eylediklerin bildirip hilâf-ı şer‘ ve kānûn ve bi gayri hakkın ol vechile nesne talebiyle dahl ve rencîde ettirilmeyip men‘ ve def‘ olunmak bâbında emr-i şerîfim recâ eyledikleri ecilden buyurdum ki hükm-i şerîfimle vardıklarında husûs-ı mezbûra tamâm hak ve adl üzre mukayyed olup göresin. İ‘lâm olunduğu üzre ise eyyâm-ı sa‘âdetimde bir ferde te‘addî olunduğuna rızâ-yı şerîfim yokdur bunlar karyeleri toprağında zirâ‘atleriyle hâsıl eyledikleri terekelerinin öşrün ve çayırlarının mukāta‘asın ve sâir hukūk ve rüsûmların kānûn ve defter mûcebince verdiklerinden sonra karyeleri zâbitlerine hilâf-ı şer‘ ve kānûn satdıklarının otluklarından tekrâr öşür ve resm ve müft ve meccânen yem ve yemek ve sâir me’kûlât talebiyle dahl ve rencîde etmeyeler ve ettirmeyip men‘ ve def‘ eyleyesin men‘ ile memnû‘ olmayıp vech-i meşrûh üzre te‘addî ve tecâvüz ederler vukū‘u üzre yazıp arz edip min ba‘d şer‘-i şerîfe ve kānûn ve emr-i hümâyûnum hilâfına kimesneye iş ettirmeyesin. Kaziyyede medhali olmayanları dahl ettirmeyip husûs-ı mezbûre için tekrâr şikâyet olunup emr-i âhar varmalı eylemeyesin şöyle bilesin alâmet-i şerîfe i‘timâd kılasın. Tahrîren fî evâhiri şehri Ramazâni’l-mübârek li sene ihdâ ve tis‘în ve elf. Mahrûse-i Kostantıniyye.