Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 547 Hüküm no: 686 Orijinal metin no: [105b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Terkos, Midye, Çatalca ile Büyük ve Küçükçekmece’den ot satın alınması için hüküm sureti Mefâhirü’n-nüvvâb ve’l-müteşerri‘în Çekmece-i kebîr ve sagīr ve Terkos ve Midye ve Çatalca nâibleri -zîde ilmühüm- ve mefâhirü’l-emâsil ve’l-akrân kethüdâ yerleri ve yeniçeri serdârları ve a‘yân-ı vilâyetin iş erleri -zîde kadruhüm- tevkī‘-i refî‘-i hümâyûn vâsıl olucak ma‘lûm ola ki hâlâ şikâr-ı hümâyûnum için ziyâde otluk lâzım ve iştirâ ve tedârükü mühim olmağın imdi irsâl olunan nakid akçe ile her bir arabası ikişer yüz vakıyye gelip ve her arabasına nakli ile seksener akçe verilmek üzre Büyükçekmece’den üç yüz araba ve Küçükçekmece’den dahi üç yüz araba ve Terkos nâhiyesinden dahi üç yüz araba ve Midye nâhiyesinden dahi üç yüz araba ve Çatalca nâhiyesinden dahi üç yüz araba ki cem‘an bin beş yüz araba otluk mu‘accelen iştirâ ve tedârük ve Davudpaşa menziline nakl ve kabza memûr olana teslîm edip ve teslîmine temessük alıp Mevkūfât defterlerine kayd ve itmâm-ı hizmet ettirilmek fermânım olmuşdur buyurdum ki hükm-i şerîfimle vardıkda bu bâbda sâdır olan emrim üzre amel edip dahi kat‘â te’hîr ve tevakkuf eylemeyip irsâl olunan nakid akçe ile zikr olunan nâhiyelerden iştirâsı fermânım olan ol mikdâr araba otluğu mu‘accelen iştirâ ve tedârük ve bir gün evvel menzil-i mezbûra nakl ve kabza memûr olana teslîm edip ve teslîmine temessük alıp Mevkūfât defterlerine kayd ve itmâm-ı hizmet eylemekde her biriniz ziyâde ihtimâm avk ve te’hîrden be gāyet ihtirâz eyleyesiz ve zikr olunan otluk iştirâsına mu‘âf ve gayr-ı mu‘âf dâhillerdir ale’s-seviyye tevzî‘ ve edâ ettirip biz mu‘âfız deyû kimesneye te‘allül ve muhâlefet ettirmeyesiz ve hesâb-ı merkūm üzre lâzım gelen akçelerin iştirâ mübâşiri yedinden ashâbına hakların tamâmen verdirip kimesnenin bir akçesin ketm ettirmeyesiz, şöyle bilesiz alâmet-i şerîfe i‘timâd kılasız. Tahrîren fi’r-râbi‘ ve’l-ışrîn Cumâdelâhire sene [10]90. Vasale fî 10 Receb sene [10]90. Evâil-i Cemâziyelâhir der sene [10]90. İştirâ olunan şikâr-ı hümâyûn nâhiye-i Terkos berâ-yı menzil-i Davudpaşa Nâhiye-i Terkos menzil-i Davudpaşa 300 araba 24.000 akçe Fî 27 C[umâdelâhire] sene 1090. Defter-i iştirâ-i kiyâh-ı huşk berâ-yı şikâr-ı hümâyûn an nâhiye-i Küçükçekmece ma‘a kurâ-yı Hazret-i Ebâ Eyyûb-i Ensârî ve suyolcuyân berâ-yı menzil-i Davudpaşa el-vâki‘ fî sene 1090 ber mûceb-i defter-i Hazîne-i âmire. Nâhiye-i Küçükçekmece ma‘a Eyyûb-i Ensârî ve suyolcuyân berâ-yı menzil-i Davudpaşa Giyâh-ı huşk Araba 300 aded, fî 80 Yekûn: 24.000 Tahrîren fî 27 [Cumâdelâhire] sene 1090.