Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 548 Hüküm no: 687 Orijinal metin no: [105b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çatalca’da yapılan bina için Terkos, Çatalca ve Çekmeceler’den araba ve ırgat temin edilmesiyle ilgili hüküm kaydı Mefharü’n-nüvvâb ve’l-müteşerri‘în Çatalca ve Terkos ve Çekmece-i kebîr ve Çekmece-i sagīr nâibleri -zîde ilmühüm- ve mefharü’l-emâsil ve’l-akrân kethüdâ yerleri ve yeniçeri serdârları ve a‘yân-ı vilâyetin iş erleri -zîde kadruhüm- tevkī‘-i refî‘-i hümâyûn vâsıl olucak ma‘lûm ola ki hâlâ Çatalca’da vâki‘ binâ-i hümâyûnuma lâzım olan mühimmâtın nakli için araba ihrâcı ve ırgad tedârükü lâzım olmağın imdi beher araba yirmişer akçe ücret ile kırkar gün hizmet eylemek üzre Çatalca kazâsında yirmi beş araba ve Terkos nâhiyesinden dahi yirmi beş araba ve Çekmeceler’den yirmi araba, cem‘an yetmiş araba ihrâc ve yine her bir nefer ırgad yevmiye yirmişer akçe ücret ile yirmişer gün işlemek üzre Çatalca kazâsından yüz nefer ve Terkos nâhiyesinden elli nefer ve Çekmece-i Kebîrden altmış nefer cem‘an iki yüz on nefer ırgad mu‘accelen ihrâc ve binâ-i hümâyûnumda edâ-i hizmet ettirmeğe her biriniz ihtimâm edip avk ve te’hîrden ihtirâz eyleyesiz deyû fermân olmuşdur buyurdum ki hükm-i şerîfimle vardıkda bu bâbda sâdır olan emrim üzre amel edip dahi kat‘â te’hîr ve tevakkuf eylemeyip vech-i meşrûh üzre zikr olunan nâhiyelerden ihrâcı fermânım olan araba ve ırgadı mu‘accelen ihrâc ve edâ-i hizmet ettirmekde her biriniz ziyâde ihtimâm edip ihmâl ve müsâheleden be gāyet ihtimâm eyleyesiz ve edâ-i hizmet eyleyenlerin hesâb-ı merkūm üzre ücretleri şehremîni yedinden bi’t-tamâm akçeleri verilir bir akçeleri ketm olunmaz bilmiş olasız şöyle bilesiz alâmet-i şerîfe i‘timâd kılasız. Tahrîren fi’l-yevmi’l-hâmis ışrîn min şehri Cumâdelâhire li sene tis‘în ve elf. Mahrûse-i Kostantıniyye.