Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 552 Hüküm no: 692 Orijinal metin no: [106b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şikâr-ı Hümâyûn için Terkos, Büyükçekmece ve Küçükçekmece nahiyelerinden zahire satın alınmasına dair hüküm kaydı Saman ve şa‘îr iştirâ emridir. Mefâhirü’n-nüvvâb ve’l-müteşerri‘în Büyükçekmece ve Küçükçekmece ve Terkos ve Çatalca nâhiyeleri nâibleri -zîde ilmühüm- ve mefâhirü’l-emâsil ve’l-akrân kethüdâ yerleri ve yeniçeri serdârları ve a‘yân-ı vilâyetin iş erleri -zîde kadruhüm- tevkī‘-i refî‘-i hümâyûn vâsıl olucak ma‘lûm ola ki inşâ’allâhü te‘âlâ vâki‘ olacak şikâr-ı hümâyûn için ziyâde zahîre lâzım ve iştirâ ve tedârükü mühim olmağın imdi Çatalca menziline nakl ile şa‘îrin her İstanbul kilesi otuzar akçeden ve dakīkin kilesi seksener akçeye ve samanın kantarı yirmi beşer akçeye ve odunun arabası ikişer çeki gelmek üzre altmış akçeye ve otluk çeken arabası ikişer yüz vakıyye gelip dahi bir arabası seksener akçeye olmak üzre Büyükçekmece nâhiyesinden iki bin keyl şa‘îr ve iki yüz kile dakīk ve bin kantar saman ve otuz araba otluk ve Küçükçekmece nâhiyesinden bin beş yüz keyl şa‘îr ve yüz keyl dakīk ve otuz araba otluk ve Terkos nâhiyesinden dört bin beş yüz keyl şa‘îr ve üç bin beş yüz kantar saman ve beş yüz araba odun ve Çatalca nâhiyesinden üç bin keyl şa‘îr ve iki yüz keyl dakīk ve bin kantar saman ve bin beş yüz araba odun ve elli araba otluk mu‘accelen iştirâ ve tedârük ve Çatalca menziline nakl ve kabza memûr olana teslîm ettirilmek fermânım olmuşdur buyurdum ki vardıkda bu bâbda sâdır olan emir üzre amel edip dahi kat‘â te’hîr ve tevakkuf eylemeyip şikâr-ı hümâyûn için zikr olunan nâhiyelerden iştirâsı fermân olan zehâyiri mu‘accelen iştirâ ve tedârük ve bir gün evvel Çatalca menziline nakl ve kabzına memûr olana teslîm edip ve yedinden temessük alıp Mevkūfât defterine kayd ettirdip itmâm-ı hizmet eylemekde her biriniz ihtimâm edip avk ve te’hîrden ihtirâz eyleyesin ve zikr olunan iştirâ teklîfine mu‘âf ve gayr-ı mu‘âf dâhillerdir, cümleye ale’s-seviyye tevzî‘ ve edâ ettirdip biz mu‘âfız deyû kimesneye inâd ve muhâlefet ettirmeyesiz ve hesâb üzre bahâları hîn-i teslîmde mübâşir yedinden akçeleri tamâmen verilir bir akçeleri ketm olunmaz bilmiş olasız şöyle bilesiz alâmet-i şerîfime i‘timâd kılasız. Tahrîren fi’l-yevmi’l-âşir min şehri Cumâdelâhire li sene tis‘în ve elf. Kostantıniyye el-mahrûse. Vasale ileynâ fî 27 min Recebi’l-mürecceb sene [10]90.