Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 551 Hüküm no: 691 Orijinal metin no: [106b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice Sultan’ın Eyüp’te fırın inşasına izin verilmesine dair hüküm kaydı A‘lemü’l-ulemâ’i’l-mütebahhirîn efdalü’l-fuzalâ’i’l-müteverri‘în yenbû‘ü’l-fazlı ve’l-yakīn keşşâfü’l-müşkilâti’d-dîniyye hallâlü’l-mu‘dilâti’l-yakīniyye miftâhu künûzi’l-hakāyık misbâhu rumûzi’d-dekāyık el-mahfûfu bi sunûfi avâtıfi’l-meliki’l-a‘lâ sâbıkan Rumeli kazaskeri olup hâlâ Hâslar kazâsına mutasarrıf olan mevlânâ Feyzullah -edâmallâhu te‘âlâ fezâ’iluhû- tevkī‘-i refî‘-i hümâyûn vâsıl olucak ma‘lûm ola ki seyyidetü’l-muhadderât iklîletü’l-muhassanât tâcü’l-mestûrât zâtü’l-aliyyi ve’s-sa‘âdât kerîme-i mükerreme Hatice Sultan -dâmet ismetühâ- tarafından rikâb-ı hümâyûnuma arzuhâl sunulup medîne-i Eyyûb-i Ensârî’de leb-i deryâda vâki‘ menzil kurbunda mutasarrıfe olduğu arz-ı hâliye üzerine hâs ekmek işlemek üzre mahsûs bir fırın binâ etmek için izn-i hümâyûnum ricâ etmeğin müşârün-ileyhâya mahsûs olmak üzre bir fırın binâ ve hâs ekmek işlemek bâbında hatt-ı hümâyûn-ı sa‘âdet-makrûnumla fermân-ı âlîşânım sâdır olmuşdur buyurdum ki vusûl buldukda bu bâbda hatt-ı hümâyûn-ı sa‘âdet-makrûnumla sâdır olan fermân-ı celîlü’l-kadrim üzre amel edip dahi ancak kerîme-i mükerreme-i müşârün-ileyhâya mahsûs hâs ekmek işlemek üzre mahall-i mezbûra bir fırın binâ ve hâs ekmek işletdirip min ba‘d âharı dahl [ü] ta‘arruz ettirmeyip emr-i şerîfimin mazmûn-ı münîfi ile âmil olasın şöyle bilesin alâmet-i şerîfe i‘timâd kılasın. Tahrîren fî evâsıtı şehri Cumâdelâhire sene tis‘în ve elf. Kostantıniyye el-mahrûse.