Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 554 Hüküm no: 695 Orijinal metin no: [107a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sürsat ve iştirâ zahiresi alımından Eyüp kasabası ve Hasköy’den başka suyolcu ve mahkemenin yetkisindeki köylerin sorumlu olduklarına dair hüküm kaydı A‘lemü’l-ulemâ’i’l-mütebahhirîn efdalü’l-fuzalâ’i’l-müteverri‘în yenbû‘ü’l-fazlı ve’l-yakīn keşşâfü’l-müşkilâti’d-dîniyye hallâlü’l-mu‘dilâti’l-yakīniyye miftâhu künûzi’l-hakāyık misbâhu rumûzi’d-dekāyık el-muhtassu bi mezîdi inâyeti’l-meliki’l-Mu‘în sâbıkan ( ) kazaskeri olup hâlâ ber vech-i arpalık Hâslar kazâsına mutasarrıf olan mevlânâ ( ) -edâmallâhu te‘âlâ fezâ’iluhû- tevkī‘-i refî‘-i hümâyûn vâsıl olucak ma‘lûm ola ki kazâ-i mezbûra tâbi‘ Küçükçekmece nâhiyesi karyeleri re‘âyâsı ahâlîsi Dersa‘âdet’ime arzuhâl edip sürsat ve iştirâ mahalli fermân olundukda Eyyûb-i Ensârî karyeleri re‘âyâsı ve suyolcuları dahi ma‘an kadîmden bu âna değin edâ ederler iken hâlâ fermân olunan iştirâ teklîfi yalnız Küçükçekmece nâhiyesi ahâlîsi edâya iktidârları yokdur kadîmden olageldiği üzre suyolcular dahi ma‘an edâ-i hizmet eylemek bâbında emr-i şerîfim recâ eylediği ecilden Hazîne-i âmiremde mahfûz olan Mevkūfât defterlerine nazar olundukda nâhiye-i mezbûreye sürsat ve iştirâ fermân olundukda nefs-i Eyyûb-i Ensârî ve Hasköy’den mâ‘adâ cümle kurâ ahâlîsi mu‘âf ve gayr-ı mu‘âf gerek suyolcu ve mahkeme karyeleri ale’s-seviyye umûm üzre verip ahvâllerine nizâm verilmek üzre iştirâ ve sürsat tekâlîfi vâki‘ oldukda nefs-i Eyyûb ve Hasköy karyelerinden mâ‘adâ nâhiyesi ve Küçükçekmece nâhiyesi ahâlîsi gerek mu‘âf ve gayr-ı mu‘âf ve suyolcu ve mahkeme kurâları cümlesi alâ seviyyetin edâ edip muhâlefet ettirilmemek üzre bin seksen sekiz Rebî‘ulâhiri’nin yirmi dokuzuncu günü emr-i şerîf verildiği mastûr ve mukayyed bulunmağın imdi mukaddemâ verilen emr-i şerîf mûcebince amel olunmak fermânım olmuşdur buyurdum ki hükm-i şerîfim vardıkda bu bâbda sâdır olan emrim üzre amel edip dahi sürsat ve iştirâ teklîfine nefs-i Eyyûb ve Hasköy karyesinden mâ‘adâ sâir kurâ ve suyolcu ve mahkeme karyeleri cümlesi ale’s-seviy dâhil olmağla ma‘an edâ ettirdip mukaddemâ ve hâlâ verilen evâmir-i şerîfime muhâlefet [ve] te‘allül ve nizâ‘ ettirmeyesin şöyle bilesin alâmet-i şerîfe i‘timâd kılasın. Tahrîren fi’l-yevmi’r-râbi‘ min şehri Şa‘bâni’l-mu‘azzam li sene tis‘în ve elf. Be makām-ı Kostantıniyye el-mahrûse Vasale ileynâ fî 6 Şa‘bâni’l-mu‘azzam [sene 1090.]