Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 572 Hüküm no: 731 Orijinal metin no: [111a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Usta Vakfı eski mütevellisi hesabının görülmesi için hüküm sureti Akzâ kuzâti’l-müslimîn evlâ vülâti’l-muvahhidîn ma‘denü’l-fazl ve’l-yakīn hüccetü’l-hakkı ale’l-halkı ecma‘în vârisü ulûmi’l-enbiyâ ve’l-mürselîn el-muhtassu bi mezîdi inâyeti’l-meliki’l-Mu‘în İstanbul kadısı pâyesiyle Hâslar kadısı olan mevlânâ ( ) -zîde fazluhû- tevkī‘-i refî‘-i hümâyûn vâsıl olucak ma‘lûm ola ki müteveffâ Hasan Usta evkāfı’nın bi’l-fi‘l berât-ı şerîfimle mütevellîsi olan kıdvetü’l-emâsil ve’l-akrân Mehmed -zîde kadruhû- südde-i sa‘âdetime arzuhâl edip evkāf-ı mezbûrede sâbıkan mütevellî olan Âişe mâl-ı vakfa müte‘allik da‘vâları olmağla şer‘le görülüp ihkāk-ı hak olunmak bâbında emr-i şerîfim ricâ etmeğin sa‘âdetlü Hâslar kadısı ahvâlin şer‘le görüp ihkāk-ı hak eylemen emrim olmuşdur buyurdum ki Dergâh-ı mu‘allâm çavuşlarından kıdvetü’l-emâsil Mehmed Çavuş hükm-i şerîfimle vusûl buldukda bu bâbda sâdır olan emrim üzre amel edip ihzâr-ı husamâ kılıp mukaddemâ bir def‘a şer‘le görülüp fasl olunmak husûsların tamâm hak [ve] adl üzre mukayyed olup göresiz i‘lâm olunduğu üzre ise ol bâbda muktezâ-yı şer‘-i kavîm ile amel edip dahi mezbûrun zimmetinde zuhûr eden mal-ı vakf cüz’î ve küllî her ne ise ba‘de’s-sübût hükm edip alıverip şer‘-i şerîfe ve emr-i hümâyûnuma muhâlif kimesneye iş ettirmeyip kaziyyede medhali olmayanları dahl ve ta‘arruz ettirmeyip eslemeyip inâd ve muhâlefet edenleri ism ve resimleri ile vukū‘u üzre yazıp Âsitâne-i sa‘âdetime arz eyleyip husûs-ı mezbûr için tekrâr bir dahi emr-i âhar varmalı eylemeyesin şöyle bilesin alâmet-i şerîfe i‘timâd kılasın. Tahrîren fî evâsıtı şehri Recebi’l-mürecceb li sene ihdâ ve tis‘în ve elf.