Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 575 Hüküm no: 735 Orijinal metin no: [111b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul’dan Edirne’ye gidecek olan padişahın geçeceği yol güzergahının temizlenip işaretler konulmasıyla ilgili hüküm Mefâhirü’l-kuzât ve’l-hükkâm ma‘denü’l-fezâ’il ve’l-kelâm Âsitâne-i sa‘âdetimden Edirne’ye varınca yol üzerinde olan kadılar -zîde fazluhüm- ve mefâhirü’l-emâsil ve’l-akrân kethüdâ yeri ve yeniçeri serdârı ve a‘yân-ı vilâyetin iş erleri -zîde kadruhüm-a tevkī‘-i refî‘-i hümâyûn vâsıl olucak ma‘lûm ola ki inşâ’allâhü te‘âlâ Âsitâne-i sa‘âdetimden Edirne tarafına sefer-i hümâyûnum olmağla yolları tathîr ve alâmet vaz‘ olunmak için mu‘tâd-ı kadîm üzre her menzilde ve yollarda tepe yıkdırıp ve kazma ve kürek tahmîli için ikişer araba verip yolları gereği gibi tathîr ettirip ihmâl ve müsâhele eylemeyesiz deyû fermânım olmuşdur buyurdum ki hükm-i şerîfimle vardıkda bu bâbda sâdır olan emrim üzre amel edip avk ve te’hîr ve tevakkuf eylemeyip vech-i meşrûh üzre mu‘tâd olan alâmet ve yollarda tepe yıkdırıp ve kazma ve kürek tahmîli için ikişer araba verip ve yolları gereği gibi tathîr ettirdip avk ve te’hîr ve ihmâl ve müsâheleden yolundan? ihtirâz edip vech-i meşrûh üzre olan emr-i şerîfime [göre iş] göresiz alâmet-i şerîfime i‘timâd kılasız. Tahrîr fî Şevvâli’l-mükerrem li sene ihdâ ve tis‘în [ve elf.] Kostantıniyye.