Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 576 Hüküm no: 736 Orijinal metin no: [111b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmihan bt. Hasan’ın evini Mehmed b. Abdullah ile karısı Fâtıma bt. Sarı Ali’ye satması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Fethi Çelebi mahallesi sâkinelerinden İsmihân bt. Hasan nâm hâtunun li ebeveyn er karındaşı ve tarafından bey‘-i âti’z-zikri ve kabz-ı semeni ikrâra vekîli olup hasm-ı şer‘î mahzarında mezbûrenin zâtını ma‘rifet-i şer‘iyye ile ârifân Hüseyin b. Osman ve Ahmed b. Bâli nâm kimesneler şehâdetleriyle şer‘an vekâleti sâbite olan Mehmed Çelebi nâm kimesne meclis-i şer‘-i hatîr-i lâzımü’t-tevkīrde işbu râfi‘â’l-kitâb kendi tarafından asîl ve zevcesi Fâtıma Hâtun bt. Sarı Ali tarafından ikrâr-ı âti’z-zikri tasdîke vekîl olup nehc-i şer‘î ve tarîk-i mer‘î üzre vekâleti şer‘an sâbite olan Mehmed Bey b. Abdullah nâm kimesne mahzarında bi’l-vekâle ikrâr-ı sahîh-i tâm ve takrîr-i kelâm edip kız karındaşım müvekkilem merkūme İsmihân Hâtun akd-i âti’z-zikrin sudûruna değin silk-i mülk-i sahîhimde münselik olup mahalle-i mezkûrede vâki‘ bir tarafdan Hüseyin Efendi vakfı olan menzile ve [bir] tarafı Ali Beşe b. Sefer mülkü ve bir tarafı Muammere Hâtun bt. Abdülmennân mülkü ve bir tarafdan tarîk-i âm ile mahdûd iki bâb tahtânî odaları ve havluyu müştemil mülk menzilini bi cümleti’t-tevâbi‘ [112a] ve’l-levâhık mezbûrân Mehmed Bey ve zevcesi müvekkile-i mezbûre Fâtıma’ya ale’l-iştirâki’s-seviy yüz dokuz kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ve temlîk anlar dahi ber vech-i muharrer iştirâ ve tesellüm ve temellük ve kabûl eylediklerinden sonra semeni olan meblağ-ı mezkûrun nısfı elli dört buçuk guruşa müvekkile-i merkūme Fâtıma yedinden ve elli dört buçuk guruşu mezbûr Mehmed Bey yedinden bi’t-tamâm ve’l-kemâl ahz ve kabz eyledim ba‘de’l-yevm menzil-i mahdûd-ı mezkûrede vechen mine’l-vücûh alâkam kalmadı mezbûrân Fâtıma ve Mehmed Bey’in mülk-i müşterâsı olmuşdur keyfe mâ yeşâ’ân ve yahtârân mutasarrıf olsunlar dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min Şevvâli’l-mükerrem li sene ihdâ ve tis‘în ve elf. Şuhûdü’l-hâl: Mehmed Efendi b. İbrahim el-İmâm, Ahmed b. Receb el-Müezzin, Ali Çelebi b. Mustafa, Mustafa Beşe b. Ahmed, Hasan Beşe b. Ahmed, Abdülkādir Çelebi b. Sefer, Mustafa Çelebi b. (…) Abdullah baklava, Mahmud Çelebi b. Hasan Kasab, İsmail b. Abdullah.