Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 577 Hüküm no: 737 Orijinal metin no: [112a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasap olan Halil Beşe b. İbrahim ile Ali Beşe b. Durmuş’un alacak hususunda Minho v. Yani ile sulh olması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-[’de] kasab tâifesinden Halil Beşe b. İbrahim ve Ali Beşe b. Durmuş nâm kimesneler meclis-i şer‘-i şerîfde tâife-i mezbûreden işbu râfi‘ü’r-rakīm Minho v. Yani nâm zimmî muvâcehesinde her biri tav‘an ikrâr-ı tâm ve takrîr-i kelâm edip mersûm Minho zimmetinde cihet-i sermayeden on bin dokuz yüz akçe hakkımız olup hâlâ taleb eylediğimizde vermede te‘allül etmeğin beynimizde münâza‘ât-ı kesîre vâkı‘a olmuşdu el-hâletü hâzihî beynimizde muslihûn-ı müslimûn tavassut edip meblağ-ı mezkûr da‘vâsından merkūm Minho ile bizi altı bin akçe üzerine inşâ-i akd-i sulh eylelediklerinde biz dahi sulh-ı mezkûru kabûl ve bedel-i sulh olan meblağ-ı mezbûr altı bin akçeyi mesfûr Minho yedinden bi’t-tamâm ve’l-kemâl ahz ve kabz edip meblağ-ı mezkûra müte‘allika âmme-i da‘vâdan merkūm Minho’nun zimmetini ibrâ-i âm ile ibrâ ve iskāt eyledik dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin aşer min Şevvâli’l-mükerrem fi’s-seneti’l-mezbûre. Şuhûdü’l-hâl: İbrahim Çavuş b. ( ), el-Hâc Mehmed b. Bâli, Hüseyin Beşe b. Receb, Hüseyin b. Ali