Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 578 Hüküm no: 739 Orijinal metin no: [112a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şeyh Nasrullah Efendi kızı Emetullah’ın evini Esam Ahmed Çelebi Vakfı’na istiğlâl yoluylasatması Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-[’de] Takyecibaşı mahallesi sâkinelerinden fahrü’l-muhadderât Emetullah bt. eş-Şeyh Nasrullah Efendi nâm hâtunun zevci ve tarafından husûs-ı âti’l-beyânı ikrâra vekîl-i sâbitü’l-vekâlesi olan umdetü’l-müderrisîn Mehmed Efendi b. Mahmud meclis-i şer‘-i şerîfde yine medîne-i mezbûrede vâki‘ merhûm Esam Ahmed Çelebi vakfı’na bi’l-fi‘l mütevellî olan işbu râfi‘ü’l-kitâb Mehmed Çelebi b. Mustafa mahzarında bi’l-vekâle ikrâr ve takrîr-i kelâm edip müvekkilem mezbûre Emetullah Hâtun silk-i mülk-i sahîhinde münselik olup mahalle-i mezbûrede vâki‘ bir tarafı Bîzebân Hâtun mülkü ve bir tarafı Takyecibaşı vakfı ve bir tarafı ba‘zan bozacı İbrahim ve ba‘zan Kasım Efendi vakfı ve bir tarafı ba‘zan Sinan nâm kimesne vakfı ve ba‘zan tarîk-i âm ile mahdûd iki bâb fevkānî ve iki bâb tahtânî odaları ve bir matbah ve bi’r-i mâ ve zât-ı eşcâr-ı müsmire ve gayr-ı müsmire bahçeyi müştemil mülk menzilimi cemî‘ tevâbi‘ ile mütevellî-i mezbûr Mehmed Çelebi’ye doksan esedî guruşa bi tarîki’l-istiğlâl bey‘ ve teslîm ol dahi vakf-ı mezbûr malıyla tarîk-i merkūm üzre iştirâ ve tesellüm ve kabûl eyleyip semeni olan meblağ-ı mezbûr doksan esedî guruşu mütevellî-i mezbûr Mehmed Çelebi yedinden bi’t-tamâm ahz ve kabz eylediğimden sonra yine mütevellî-i mezbûr menzil-i mahdûd-ı mezkûru ba‘de’t-tahliyyeti’ş-şer‘iyye ve’t-tekābuzi’l-mer‘î sene-i âtî Muharremi gurresinden her senesi on üçer buçuk esedî guruşa üç sene tamâmına değin cem‘an kırk buçuk esedî guruş ücret ile müvekkile-i mezbûre Emetullah Hâtun’a îcâr ve teslîm ol dahi minvâl-i muharrer üzre istîcâr ve tesellüm ve kabûl eyledim dedi dedikde gıbbe’t-tasdîki’ş-şer‘î vekîl-i mezbûr Mehmed Efendi mezbûr Mehmed Çelebi mahzarında takrîr-i kelâm edip menzil-i mezkûrun derkine ve ücret-i merkūmeye ve meblağ-ı mezbûr doksan esedî guruşa emr ve kabûlü hâviye kefâlet-i sahîha-i şer‘iyye kefîl oldum dedikde ba‘de’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’l-ışrîn min Şevvâli’l-mükerrem fi’s-seneti’l-mezbûre. Şuhûdü’l-hâl: Seyyid Sâlih Çelebi b. Ebûbekir, Mehmed Çelebi b. Veli, Ahmed Çelebi b. Mehmed, Mustafa b. Mehmed, Mehmed Efendi b. Yusuf.