Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 578 Hüküm no: 740 Orijinal metin no: [112a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Abdullah’ın cariyesi Gülistan’ı azat etmesi Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Câmi‘-i Kebîr mahallesi sâkinelerinden fahrü’l-muhadderât Âişe bt. Abdullah nâm hâtun tarafından ıtk-ı âti’l-beyânı ikrâra vekîl olup mezbûrenin zâtını ma‘rifet-i şer‘iyye ile ârifân olan Musli Çelebi b. Receb ve Mehmed Çelebi b. Mustafa nâm kimesneler şehâdetleriyle şer‘an vekâleti sâbit olan zevci fahrü’l-eşbâh el-Hâc Pîrî Çelebi [b.] el-Hâc Kaytas meclis-i şer‘-i şerîfde müvekkile-i mezbûra rıkkını mu‘terife işbu orta boylu açık kaşlı siyah gözlü Efrenciyyetü’l-asl bâ‘isetü’l-vesîka Gülistan bt. Abdullah nâm câriye-i memlûkesi muvâcehesinde bi’l-vekâle ikrâr-ı tâm ve takrîr-i kelâm edip müvekkile-i mezbûre Âişe câriye-i mezbûreyi cemî‘ malından ifrâz edip hasbeten lillâhi te‘âlâ i‘tâk ve tahrîr ve zümre-i harâir-i asliyyâta idrâc ve ilhâk eyleyip min ba‘d sâir asliyyât gibi hürre olup üzerinde hakk-ı velâdan gayrı hakkım kalmadı dedi dedikde mâ cerâ bi’t-taleb ketb olundu. Fi’l-yevmi’s-sâlis ve’l-ışrîn min Şevvâli’l-mükerrem li sene ihdâ ve tis‘în ve elf. Şuhûdü’l-hâl: Yusuf Bey Muhtesib, Mustafa Beşe b. Abdullah, Mehmed b. Eyüb, Mehmed b. Mahmud ve gayruhüm.