Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 392 Hüküm no: 455 Orijinal metin no: [62b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola v. Lako ile Kolo v. Larka arasındaki alacak davasında sulh olduğu Mahmiye-i İstanbul hısnı ebvâbından Kumkapı hâricinde meyhâneci tâifesinden Nikola v. Lako nâm zimmî meclis-i şer‘-i hatîr-i lâzım[ü’t-tevkīrde] yine tâife-i mezbûreden Kolo v. Larka nâm zimmî muvâcehesinde ikrâr ve takrîr-i kelâm edip merkūm Kolo zimmetinde cihet-i deyn-i şer‘îden on sekiz bin akçe hakkım olup meblağ-ı mezbûru mukaddemâ mezbûr Kolo’dan taleb ve da‘vâ ettiğimde beynimizde münâza‘ât-ı kesîre vukū‘undan sonra muslihûn tavassut edip meblağ-ı mezbûr da‘vâsından mezbûr Kolo ile beynimizde üç bin iki yüz akçe üzerine inşâ-i akd-i sulh ettiklerinde ben dahi sulh-i mezbûru kabûl etmişidim hâlâ bedel-i sulh olan meblağ-ı mezbûr üç bin iki yüz akçeyi merkūm Kolo yedinden tamâmen ahz u kabz edip mâ‘adâdan zimmetini ibrâ ve iskāt eyledim dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer min Recebi’l-mürecceb li sene seb‘a ve seb‘în ve elf. Şuhûdü’l-hâl: Şükrullah Bey b. Mustafa, Baba Resul b. Rıdvan, Hasan Çelebi b. Ahmed, Veli b. Mahmud.