Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 391 Hüküm no: 454 Orijinal metin no: [62b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Kaya bt. Mehmed’in terekesinin vârisler arasında paylaşıldığı Mahmiye-i İstanbul’da Kabasakal mahallesinde sâkine iken bundan akdem vefât eden Kaya bt. Mehmed’in verâseti vâlidesi Kâtibe bt. Abdullah’a ve li eb er karındaşı Nuh nâm sagīr ile li eb kız karındaşı Kerime’ye ve li üm kız karındaşı Hâmide’ye münhasıra ve tashîh-i mes’eleleri on sekiz sehimden olup sihâm-ı mezbûrenin üç sehmi vâlidesi merkūmeye ve sekiz sehmi merkūm Nuh’a ve dört sehmi mezbûre Kerime’ye ve üç sehmi mezkûr Hâmide’ye münhasıra olduğu şer‘an zâhir ve müte‘ayyin oldukdan sonra merkūm Nuh’un vasîsi ve vâlidesi Müstakīm bt. Abdullah nâm hâtun meclis-i şer‘-i hatîrde tereke-i müteveffât-ı merkūma vâzı‘atü’l-yed olan merkūme Kâtibe’nin zevci ve tarafından husûs-ı âtîye vekîl-i sâbitü’l-vekâlesi olan Mehmed b. Musli nâm kimesne mahzarında bi’l-vesâye ikrâr ve takrîr-i kelâm edip vasîsi olduğumuz sagīr-i merkūm Nuh’un mûrisesi müteveffât-ı mezbûre Kaya’nın zimem-i nâsda olan hukūkundan mâ‘adâ sâir terekesinden defter-i kassâm mûcebince merkūm Nuh’un sekiz sehim hissesine isâbet eden otuz üç esedî guruşu müvekkile-i mezbûre Kâtibe yedinden bi’l-vesâye alıp kabz eyledim, min ba‘d meblağ-ı mezkûrdan müvekkile-i merkūme yedinde merkūm Nuh’un bir akçe ve bir habbe hakkı kalmamışdır dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-ışrîn min Recebi’l-ferd li sene seb‘a ve seb‘în ve elf. Şuhûdü’l-hâl: Cebecibaşı Ahmed, Ali b. Mustafa, Abdurrahman [b.] Mehmed, Mehmed b. Abdullah, Süleyman [b.] Şaban.