Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 594 Hüküm no: 764 Orijinal metin no: [115b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Süleyman’ın hamamını tamir etmek şartıyla Derviş Bey b. Hüseyin’e kiraya vermesi Medîne-i Hazret-i Ebâ Eyyûb el-Ensârî’de Kiremitçi Süleyman Çelebi mahallesinde sâkin fahrü’l-akrân Mehmed Ağa b. Süleyman tarafından husûs-ı âti’l-beyânı ikrâra vekîl olup hasm-ı câhid-i şer‘î mahzarında İbrahim Çelebi b. Mustafa ve Mustafa b. Ömer şehâdetleriyle şer‘an vekâleti sâbite olan Mehmed Çelebi b. Abdullah meclis-i şer‘-i şerîfde işbu râfi‘ü’l-kitâb Derviş Bey b. Hüseyin mahzarında bi’l-vekâle ikrâr ve takrîr-i kelâm edip müvekkilim mûmâ-ileyh Mehmed Ağa’nın mülkü olup mahalle-i mezbûrede debbâğhâne ve kendi mülk menzili kurbunda vâki‘ hamamını ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâb şehrinin onuncu gününden bir sene tamâmına değin ta‘mîr ve termîm iktizâ ettikde müvekkilim mûmâ-ileyh Mehmed Ağa kendi malından etmek üzre beher yevm yetmiş beşer akçeye mezbûr Derviş Bey’e vekâletim hasebiyle îcâr ve teslîm eyledim dedikde mezbûr Derviş Bey minvâl-i muharrer üzre istîcâr ve tesellüm ve kabûl eyledim dedikde ahadühümâ âhar şey’? kelimât-ı mahkiyesini vicâhen ve şifâhen tasdîk ve tahkīk etmeğin mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Şevvâli’l-mükerrem li sene ihdâ ve tis‘în ve elf. Şuhûdü’l-hâl: Nasuh Efendi b. Abdüsselâm, Hüseyin b. Ali, Mehmed b. Eyüb, Mehmed b. Mahmud.