Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 593 Hüküm no: 763 Orijinal metin no: [115b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Hacı Mustafa b. Musa’nın bahçesinin vârisi tarafından bostancı Kuşçubaşı Hasan Ağa’ya satılması Mahmiye-i İstanbul hısnı ebvâbından Yenikapı hâricinde Emânî Çelebi mahallesinde sâkin iken bundan akdem vefât eden el-Hâc Mustafa b. Musa’nın zevce-i metrûkesi Âişe bt. Durmuş nâm hâtundan gayrı zâhirde vâris-i ma‘rûfu olmamağla muhallefâtının rub‘u merkūme Âişe’ye ve selâse erbâ‘ı beytülmâl cânibine âid olmağın mahmiye-i mezkûrede bi’l-fi‘l gümrük emîni olup beytülmâl-i âmme ve hâssa kabzına memûr olan fahrü’l-emâcid ve’l-ekârim Hüseyin Ağa tarafından husûs-ı âti’l-beyâna vekîl-i müsecceli olup mahmiye-i mezkûre hısnı ebvâbından Edirnekapısı hâricinde Küçük Hâslar zâbiti olan el-Hâc Yusuf b. Abdullah nâm kimesne ile mezbûre Âişe’nin li ebeveyn er karındaşı ve tarafından zikri âtî bahçede olan bir sehim hisse-i şâyi‘asını bey‘a ve semenini kabza ve kendiye îsâle ve kabz ve îsâl mütevakkıf olduğu umûrun küllîsine vekîl-i müsecceli olan Ali Beşe nâm kimesne meclis-i şer‘-i şerîfde hâssa bostânîlerinden işbu râfi‘ü’l-kitâb fahrü’l-eşbâh kuşçubaşı Hasan Ağa b. Abdullah mahzarında her biri bi’l-vekâle ikrâr-ı tâm ve takrîr-i kelâm edip müteveffâ-yı mezbûrun muhallefâtından olup mahalle-i mezbûrede vâki‘ iki tarafdan Abdülbâkī Bey mülkü ve bir tarafdan çıkıncı Hüseyin harmanı ve bir tarafdan tarîk-i âm ile mahdûd iki bâb fevkānî ve iki bâb tahtânî sagīr odaları dahi ve zât-ı eşcâr-ı müsmire ve gayr-ı müsmire bahçe ve bir dolab kapısını ve kenîfi müştemil bahçe bey‘ olunup semeninden zevcesi müvekkile-i merkūmenin rub‘ hisse-i irsiyyesi verilmek lâzım gelmekle zikr olunan bahçe sûk-ı sultânîde kirâren ve mirâren nidâ ve müzâyede olunup rağabât-ı nâs bi’l-külliye münkatı‘ oldukdan sonra mezbûr kuşçubaşı üzerinde seksen dört bin akçede hakk-ı karâr ile karâr edip ziyâde ile tâlib-i âhar zuhûr etmemekle zikr olunan bahçeyi meblağ-ı mezkûr seksen dört bin akçeye vekâlet-i mahkiyelerimiz hasebiyle mezbûr kuşçubaşı Hasan Ağa’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ve temlîk ol dahi ber vech-i muharrer iştirâ ve tesellüm ve temellük ve kabûl eyledikden sonra semeni olan meblağ-ı mastûr seksen dört bin akçeyi mezbûr Hasan Ağa yedinden bi’t-tamâm ve’l-kemâl ahz ve kabz edip rub‘unu müvekkile-i mezbûreye ve selâse erbâ‘ı emîn-i mûmâ-ileyh Hüseyin Ağa’ya teslîm eyledik ba‘de’l-yevm sâlifü’z-zikr bahçe mezbûr Hasan Ağa’nın mülk-i müşterâsı olmuşdur keyfe mâ yeşâ’ ve haysü mâ yahtâr mutasarrıf olsun dediklerinde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min Şevvâli’l-mükerrem li sene ihdâ ve tis‘în ve elf. Şuhûdü’l-hâl: İbrahim Çavuş b. Mustafa, Ahmed Bey b. Yusuf, İbrahim Çelebi b. Hüseyin, Mehmed Bey b. Osman, Mehmed b. Eyüb, Nasuh Efendi b. Abdüsselâm, Hüseyin Beşe Çukadâr.