Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 595 Hüküm no: 766 Orijinal metin no: [116a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul’dan Edirne’ye gönderilen has atları çekmek üzere gerekli olan neferin yol üzerindeki menzillerden tedarik edilmesine dair hüküm Mefâhirü’l-kuzât ve’l-hükkâm me‘âdinü’l-fezâ’il ve’l-kelâm Âsitâne-i sa‘âdetimden Edirne’ye varınca yol üzerinde vâki‘ olan kadılar -zîde fazluhüm- ve mefâhirü’l-emâsil ve’l-akrân kethüdâ yerleri ve yeniçeri serdârları ve a‘yân-ı vilâyetin iş erleri -zîde fazluhüm-e tevkī‘-i refî‘-i hümâyûn vâsıl olucak ma‘lûm ola ki hâliyâ Âsitâne-i sa‘âdetimden Edirne’ye gönderilen yüz yirmi re’s hâs atlar için beher yevm iktizâ eden yüz yirmi nefer yedek-keşân her biriniz taht-ı kazânızdan ihrâc ve menzilinden menzile emîn ve sâlim ulaşdırıp ihmâl ve müsâheleden be gāyet ihtirâz eyleyesiz deyû fermânım olmuşdur buyurdum ki hükm-i şerîfim vardıkda bu bâbda sâdır olan emrim üzre amel edip dahi hâlâ Âsitâne-i sa‘âdetimden Edirne’ye gönderilen yüz yirmi re’s hâs atlar için her menzilde iktizâ eden yüz yirmi nefer yedek-keşân ihrâc ve emîn ve sâlim birbirinize ulaşdırıp ihmâl ve müsâheleden ve bu bahâne ile hilâf-ı şer‘ kimesneden ahz ve celb-i maldan be gāyet ihtirâz eyleyesiz şöyle bilesiz, [alâmet-i şerîfe i‘timâd kılasız.] Fî 2 şehr-i Ramazân sene 1091.