Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 599 Hüküm no: 771 Orijinal metin no: [117a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müftükızı Odaları’nda fuhuş yapıldığının bildirilmesi üzerine tahliyye olunması Hâslar kadısı fazîletlü efendi hazretleri teftîş eyleyesiz. Devletlü ve sa‘âdetlü sultânım hazretleri sağ olsun Hazret-i Eyyûb-i Ensârî’de Nişancı mahallesi fukarâsının arzuhâlleri budur ki mahalle-i mezbûrede Müftükızı Odaları demekle ma‘rûf oda altı bâb odaların içine fevâhiş dolup dâimâ fuhş [u] fesâd hâlî değildir gece sabaha değin kılıç ile gezerler nice nice tenbîh olunup bir vechile men‘ olunmaları kābil değildir Allâhu te‘âlâ ve resûluhû azîz şerîf başınız için olsun izn-i şer‘le mezbûr odaları tahliyye fâhişeler ihrâc olunup odaları mühürlenmek bâbında fermân-ı şerîf ricâ olunur bâkī fermân sultânımındır. Bende-i ahâlî-i mahalle. Subaşı ve asesbaşı imâm ve cemâ‘at ve odabaşıyı ve fevâhişi huzûruma ihzâr edesiz deyû fermân. Hâslar kadısı fazîletlü efendi hazretleri, ba‘de’l-yevm ol odalardan fevâhişi ihrâc edip ve odalarda ol makūle fevâhiş iskân olunmayıp ahâlî-i mahalle rızâ verdikleri eyü kimesnelere îcâr ettirile deyû. Fî 3 N [Ramazan] sene [10]91.