Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 40 Hüküm no: 5 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah kızı Rabi‘a’nın terekesinden Ali oğlu Mehmed Ağa’nın hissesini aldığı Medîne-i hazret-i Ebâ Eyyüb Ensârî -radıye anhu Rabbühü’l-Bârî’de- Câmi‘-i kebîr mahallesinde sâkine iken bundan akdem vefât eden Rabi‘a bt. Derviş nâm hâtunun bâ-hüccet-i şer‘iyye vasiyy-i muhtârı olan işbu sāhibü’l-kitâb Mehmed Ağa b. Ali nâm kimesne meclis-i şer‘-i hatîr-i lâzımü’t-tevkīrde müteveffât-ı mezbûrenin terekesine vâzı‘u’l-yed olan Mehmed Çelebi b. İbrahim nâm kimesne mahzarında ikrâr ve takrîr-i kelâm edip müteveffât-ı mezbûrenin sülüs mâlından bi’l-vesâye bana isâbet ve intikāl eden dört bin dokuz yüz kırk akçeyi mezbûr Mehmed Çelebi yedinden tamâmen ahz u kabz eyledim mezbûr Mehmed Çelebi zimmetinde sülüs-i mezkûra müte‘allik kalîl [ve] kesîr celîl ve hakīr mâl ıtlâk olunur bir akçe ve bir habbe hakkım bâkī kalmayıp târîh-i kitâba gelince beynimizde cereyân eden ahz u i‘tâ ve mu‘âmelât-ı şettâya ve hukūk-ı ma‘lûme ve mechûleye müte‘allıka âmme-i de‘âvî ve mutâlebât ve muhâsamâtdan bi’l-vesâye mezbûr Mehmed Çelebi’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi benim zimmetimi ibrâ ve ıskāt eylediğinde vechen mine’l-vücûh biri birimiz ile da‘vâ ve nizâ‘ımız kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-ışrîn min-Şevvâli’l-mükerrem li-sene tis‘a ve ışrîn ve mi’e ve elf Şuhûdü’l-hâl: İsmail Çelebi b. el-Hâc Osman, Mehmed Çelebi b. Abdülkadir, es-Seyyid İsmail Çelebi b. es-Seyyid Mustafa, Ahmed Beşe b. Mustafa, Süleyman Çelebi b. Yusuf, Mehmed b. Ahmed, Mustafa Çelebi b. İsmail.