Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 44 Hüküm no: 9 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah kızı Arife Hatun’un çocuklarına nafaka tayini Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Câmi‘-i kebîr mahallesinde sâkine iken bundan akdem vefât eden Ârife Hatun bt. Abdullah’ın sadrî sagīr oğulları Mehmed ve Mustafa ve Ahmed’in babaları ve tesviye-i emrlerine kıbel-i şer‘den mansûb vesâyeti olan işbu râfi‘u’l-kitâb Osman Çelebi b. Mustafa meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr ani’l-merâm edip vasîleri olduğum sagīrûn-ı mezbûrûn Mehmed ve Mustafa ve Ahmed’in nafaka ve kisve bahâya eşedd-i ihtiyâcları olmağla vâlideleri müteveffât-ı mezbûreden müntakil mâllarından kadr-i ma‘rûf nafaka ve kisve bahâ farz ve takdîr olunmak bi’l-vesâye matlûbumdur dedikde vasiyy-i mezbûrun kelimât-ı meşrûhası vâkı‘a mutâbıka idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīrûn-ı mezbûrûnun vâlideleri müteveffât-ı mezbûreden müntakil mâllarından yevmî her birine bir akçe nafaka ve kisve bahâ farz ve takdîr buyurup meblağ-ı mefrûz-ı mezbûru levâzım-ı sagīrûn-ı mezbûrûna harc ve sarfa ve vakt-i hâcette istidâneye ve lede’z-zafer mâllarına rücû‘a vasiyy-i mezbûr Osman Çelebi’ye izin birle mâ-vaka‘a bi’t-taleb ketbolundu Fi’l-yevmi’s-sâdis ve’l-ışrîn min-Şevvâli’l-mükerrem li-sene tis‘a ve ışrîn ve mi’e ve elf Şâhidûn-ı sâbıkūn