Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 43 Hüküm no: 8 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah kızı Arife Hatun’un çocuklarına vasi tayini Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Câmi‘-i kebîr mahallesinde sâkine iken bundan akdem vefât eden Ârife Hatun bt. Abdullah’ın sadrî sagīr oğulları Mehmed ve Mustafa ve Ahmed’in tesviye-i emrlerine kıbel-i şer‘den bir vasî nasbı lâzım ve mühim olmağın emânet ile ma‘rûf ve diyânet ile mevsûf her vechile vesâyet uhdesinden gelmeğe kādir idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olan sagīrûn-ı mezbûrûnun babaları işbu râfi‘u’l-kitâb Osman Çelebi b. Mustafa nâm kimesneyi hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīrûn-ı mezbûrûnun vakt-i rüşd ü sedâdına değin tesviye-i emrlerine vasî nasb ve ta‘yîn buyurduklarında ol dahi vesâyet-i mezbûreyi kabûl ve merâsimini edâya ta‘ahhüd ve iltizâm etmeğin mâ-vaka‘a bi’t-taleb ketbolundu. Fi’l-yevmi’s-sâmin ve’l-ışrîn min-Şevvâli’l-mükerrem li-sene tis‘a ve ışrîn ve mi’e ve elf. Şuhûdü’l-hâl: İsmail Efendi b. el-Hâc Osman, Mehmed Ağa b. el-Hâc İbrahim, Mehmed Çelebi b. İbrahim, Mehmed b. Yusuf, Osman b. İbrahim, Ali Ağa b. İbrahim, Derviş Hasan b. Muharrem, es-Seyyid Mustafa b. Sefer, Ali Çelebi b. Abdulbâki.