Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 48 Hüküm no: 13 Orijinal metin no: [5a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer kızı Emine Hatun’un çocuklarına nafaka tayini Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Çavuş Kasım mahallesinde sâkine iken bundan akdem vefât eden Emine Hatun bt. Ömer’in sadrî sagīr oğlu Halil ve sadriye sagīre kızları Afife ve Âişe’nin tesviye-i emrlerine kıbel-i şer‘den mansûb vasîleri olan mezbûrûnun babaları işbu râfi‘u’l-kitâb el-Hâc İsmail b. Muslu nâm kimesne meclis-i şer‘-i şerîf-i enverde takrîr-i kelâm ve ta‘bîr ani’l-merâm edip vasîleri olduğum sagīrûn-ı mezbûrûnun nafaka ve kisve bahâya eşedd-i ihtiyâcları olmağla vâlideleri müteveffât-ı mezbûrdan müntakil mâllarından kadr-i ma‘rûf nafaka ve kisve bahâ farz olunmak bi’l-vesâye matlûbumdur dedikde vasiyy-i mezbûrun kelimât-ı meşrûhası vâkı‘a mutâbıka idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīrûn-ı mezbûrûn Halil ve Afife ve Âişe’nin vâlideleri müteveffât-ı mezbûreden müntakil mâllarından kadr-i ma‘rûf her birine yevmî beşer akçe nafaka ve kisve bahâ farz ve takrîr buyurup meblağ-ı mefrûz-ı mezbûru sagīrûn-ı mezbûrûnun nafaka ve kisve bahâlarına harc ve sarfa ve lede’l-iktizâ ve istidâneye ve inde’z-zafer mâllarından rücû‘a vasiyy-i mezbûr el-Hâc İsmail’e izin birle mâ-vaka‘a bi’t-taleb ketbolundu. Fi’l-yevmi’t-tâsi‘ ve’l-ışrîn min-Şevvâli’l-mükerrem li-sene tis‘a ve ışrîn ve mi’e ve elf Şuhûdü’l-hâl: Ali Çelebi b. Mehmed, Mehmed Çelebi b. Hızır, es-Seyyid Mustafa b. Sefer, Ali Çelebi b. Abdulbâki, Ahmed Efendi b. imâm-ı mahalle-i mezbûre, Mehmed Ağa b. Ömer, Mehmed Ağa b. İbrahim.