Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 49 Hüküm no: 14 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan oğlu Ali Ağa’nın terekesinden kız kardeşinin hissesini aldığı Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Kiremitçi Süleyman Ağa mahallesinde sâkin iken bundan akdem vefât eden Ali Ağa b. Hasan b. Halil nâm sagīrin verâseti zevce-i menkûha-i metrûkesi Emetullah bt. İbrahim nâm sagīr ile li-eb kız karındaşı Âişe Hatun ve usûbet cihetinden verâseti olup ve li-eb Rumeli’nde medîne-i Bosna’da sâkin Mehmed Ağa b. Ebubekir nâm kimesneye münhasıra ve tashîh-i mes’elesi dört sehimden olup sihâm-ı mezbûrdan bir sehmi zevcesi sagīre-i mezbûre Emetullah’a ve iki sehmi kız karındaşı mezbûre Âişe Hatun’a ve bir sehmi mezbûr Mehmed Ağa’ya isâbeti tahkīkîden sonra müteveffâ-yı mezbûrun kız karındaşı mezbûre Âişe Hatun tarafından husûs-ı âti’l-beyâna vekîl olduğu zât-ı mezbûru bi’l-ma‘rifeti’ş-şer‘iyye ârifân İsmail b. Abdullah ve Ömer Ağa b. Abdülaziz şehâdetleriyle şer‘an sâbit ve sübût-ı vekâlete hükm-i şer‘î lâhık olan zevcesi Mehmed Ağa b. Abdülaziz meclis-i şer‘-i şerîf-i enverde müteveffâ-yı mezbûrun bâ-hüccet-i şer‘iyye vasiyy-i muhtârı olmağla terekesine bi’l-vesâye vâzı‘u’l-yed olan sagīre-i mezbûre Emetullah’ın babası işbu râfi‘u’l-kitâb mezbûr İbrahim Ağa b. Mehmed mahzarında bi’l-vekâle ikrâr ve takrîr-i kelâm edip zevce-i müvekkile-i mezbûrenin karındaşı müteveffâ-yı mezbûrun terekesi tahrîr ve ba‘dehû ihrâcü’l-masârıf ve’d-düyûn ber-mûceb-i defter-i kassâm-ı askerî tashîh-i mezbûr üzere zevce-i müvekkile-i mezbûrun iki sehm hisse-i şer‘iyye-i irsiyyesine isâbet eden bir yük kırk altı bin dört yüz yetmiş dört akçeyi vasiyy-i mezbûr İbrahim Ağa bana def‘ ü teslîm ben dahi yedinden bi’l-vekâle ahz u kabz edip tereke-i müteveffâ-yı mezbûrdan müvekkile-i mezbûrun hissesine isâbet eden meblağ-ı mezbûrdan vasiyy-i merkūm [5b] İbrahim Ağa yedinden ve zimmetinde bir akçe ve bir habbe bâkī kalmayıp tereke-i müteveffâ-yı mezbûra sâlifü’z-zikr mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât mülk menzilde olan kezâlik iki sehm hisse ve mahmiye-i İstanbul’da vâki‘ Balıkpazarı kurbünde lede’l-ahâlî ve’l-cîrân ma‘lûmü’l-hudûd ve’l-müştemilât Yahûd Han’da olan kezâlik iki sehm hisse-i irsiyye-i şer‘iyyesinden mâ‘adâ tereke-i müteveffâ-yı mezbûra müte‘allıka ma‘lûme ve mechûle ve mutâlebât ve eymân ve muhâsamâtdan vasiyy-i merkūm İbrahim Ağa’nın zimmetini ibrâ-i âmm-ı kātı‘u’n-nizâ‘ ile ibrâ ve ıskāt eyledim. Fîmâ-ba‘ddehû geri? mürûr eden menzil ve Yahûd Han’dan mâ‘adâ husûs-ı mezbûra ve gayra müte‘allıka zevcem mütevekkile-i mezbûrdan bi’l-asâle ve bi’l-vekâle da‘vâ ve nizâ‘ zuhûr ederse lede’l-hükkâmi’l-kirâm mesmû‘a ve makbûle olmasın dedikde gıbbe’t-tasdîkı’ş-şer‘î mâ-hüve’l-vâkı‘ bi’t-taleb ketbolundu. Fi’l-yevmi’r-râbi‘ ve’l-ışrîn min-şehri Şevvâli’l-mükerrem li-sene tis‘a ve ışrîn ve mi’e ve elf Şuhûdü’l-hâl: Ahmed Çelebi b. Mehmed, Ahmed Çelebi b. Abdurrahim, Mehmed Ağa b. Ali, el-Hâc Abdullah b. Mehmed, el-Hâc İbrahim Ağa b. Ali, Hüseyin Ağa b. Mehmed Ağa, İsmail Efendi b. el-Hâc Osman, İbrahim Çelebi b. Halil ve gayruhüm.