Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 53 Hüküm no: 20 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden İbrahim oğlu Mustafa Beşe’nin küçük oğluna vasi tayini Havâss-ı Refî‘a kazâsı muzâfâtından Terkos nâhiyesine tâbi‘ Kefeli nâm karyede sâkin iken bundan akdem vefât eden Mustafa Beşe b. İbrahim nâm kimesnenin sulbî sagīr oğlu Musa’nın tesviye-i umûrlarına kıbel-i şer‘den bir vasî nasbı lâzım ve mühim olmağın emânet ile ma‘rûfe ve diyânet ile mevsûfe her vechile vesâyet uhdesinden gelmeğe kādir idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer oldukdan sonra sagīr-i mezbûrun vâlidesi işbu râfi‘atü’l-kitâb Hadice bt. Abdullah nâm hâtunu hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûrun vakt-i rüşd-i sedâdına değin vasî nasb ve takdîr buyurduklarında ol dahi vesâyet-i mezbûru kabûl ve merâsimini edâya ta‘ahhüd ve iltizâm etmeğin mâ-vaka‘a bi’t-taleb ketbolundu. Fi’l-yevmi’s-sânî min-Zilka‘deti’l-mübârek li-sene 1129 Şuhûdü’l-hâl: Ümm-i Mehmed Efendi b. Ramazan, Mustafa Beşe b. Ahmed, Derviş Beşe b. Abdi, Mehmed Beşe b. Abdi, Şa‘ban Çelebi b. Ramazan, İsmail Beşe b. Durali, Ali Beşe b. Rıdvan, es-Seyyid Mehmed Çelebi b. Mustafa ve gayruhüm.