Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 54 Hüküm no: 21 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim oğlu Mustafa Beşe’nin küçük oğluna nafaka tayini Havâss-ı Refî‘a kazâsı muzâfâtından Terkos nâhiyesine tâbi‘ Kefeli nâm karyede sâkin iken bundan akdem vefât eden Mustafa Beşe b. İbrahim nâm kimesnenin sulbî sagīr oğlu Musa’nın vâlidesi işbu sāhibetü’l-kitâb Hadice bt. Abdullah nâm hatun meclis-i şer‘-i hatîr-i lâzımü’t-tevkīrde ikrâr ve takrîr-i kelâm edip sagīr-i mezbûrun nafaka ve kisve bahâya eşedd-i ihtiyâc ile muhtâc olmağın babası müteveffâ-yı mezbûrdan müntakil mâlından üzerine kıbel-i şer‘den kadr-i ma‘rûf meblağ nafaka ve kisve bahâ farz ve takdîr olunmak matlûbumdur dedikde mezbûrenin kelimât-ı meşrûhası vâkı‘a mutâbıka idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mütehakkık olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûrun babasından müntakil mâlından kadr-i ma‘rûf nafaka ve kisve ve sâir levâzım-ı zarûriyesi için târîh-i kitâbdan beher yevm altışar akçe nafaka ve kisve farz ve takdîr buyurup meblağ-ı mefrûz-ı mezbûru sagīr-i mezbûrun havâic-i zarûriyesine harc ve sarfa ve lede’l-iktizâ istidâneye ve inde’z-zafer mâlına rücû‘a mezbûre Hadice’ye izin birle mâ-vaka‘a bi’t-taleb ketbolundu. Fi’t-târîhi’l-mezkûr Şuhûdü’l-hâl: Ve şuhûdü’l-mezkûr.