Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 59 Hüküm no: 27 Orijinal metin no: [7M/b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman oğlu Abdullah Çelebi’nin kızının vasiyesi olan Ümmü Gülsüm Hatun üzerine hasbî nâzır tayini Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Evlice Baba mahallesinde sâkin iken bundan akdem sefer-i hümâyûnda şehîden vefât eden Abdullah Çelebi b. Süleyman’ın sulbiye sagīre kızı Fâtıma’nın vâlidesi ve tesviye-i umûruna kıbel-i şer‘den mansûbe vasiyesi olan işbu râfi‘atü’l-kitâb Ümmü Gülsüm Hatun bt. Salih’in üzerine ber-[vech-i] hasbî nâzır lâzım ve mühim olmağın emânet ile ma‘rûf ve diyânet ile mevsûf her vechile nezâret uhdesinden gelmeğe kādir idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olan sagīr-i mezbûrenin ceddi mezbûr Süleyman Çelebi b. Abdullah’ı hâkim-i muvakkı‘-ı sadr-ı kitâb tûbâ-lehü ve hüsnü-meâb efendi hazretleri dahi sagīr-i mezbûrenin vasiyyesi olan mezbûre Ümmü Gülsüm Hatun’un üzerine hasbî nâzır nasb ve ta‘yîn buyurduklarında ol dahi nezâret-i mezbûreyi kabûl ve merâsimini edâya ta‘ahhüd ve iltizâm etmeğin mâ-vaka‘a bi’t-taleb ketbolundu. Fi’l-yevmi’s-sâlis ve’l-ışrîn min-Zilka‘deti’ş-şerîfe li-sene tis‘a ve ışrîn ve mi’e ve elf Şuhûdü’l-hâl: es-Seyyid Mustafa b. Sefer, Mustafa Efendi b. Hüseyin, Hüseyin Çelebi b. Mehmed.