Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 62 Hüküm no: 31 Orijinal metin no: [8b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tersâne-i âmire kâtibi Osman oğlu Ali Efendi’nin terekesinden eşinin alacağını talebi Husûs-ı âti’l-beyânın mahallinde istimâ‘ ve tahrîri iltimâs olunmağın bu fakīr medîne-i hazret-i Ebâ Eyyüb el-Ensârî -radıye anhu Rabbühü’l-Bârî- mahallâtından Takyecibaşı mahallesinde sâkin iken bundan akdem vefât eden tersâne-i âmirede mahzen kâtibi Ali Efendi b. Osman’ın menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî ettikde merhûm-ı mezbûrun verâseti zevce-i menkûha-i metrûkesi Havva Hatun bt. El-Hâc Osman ile li-ebeveyn kız karındaşı Hadice Hatun ve sulbiye sagīre kızı Hanife’ye münhasıra olduğu şer‘an zâhir ve mütehakkık oldukdan sonra zâtı ba‘de’t-ta‘rîfi’ş-şer‘î işbu râfi‘atü’l-kitâb zevce-i mezbûre Havva meclis-i ma‘kūd-ı mezkûrda müteveffâ-yı mezbûrun terekesine bi’l-verâse vâzı‘atü’l-yed olan kız karındaşı mezbûre Hadice Hatun mahzarında üzerine [9a] da‘vâ ve takrîr-i kelâm edip zevcim müteveffâ-yı mezbûr Ali Efendi b. Osman b. Abdullah târîh-i kitâbdan bir sene mukaddem hâl-i hayâtında ve kemâl-i akl-ı sıhhatinde cihet-i karz-ı şer‘î olmak üzere mâlımdan bin iki yüz guruş idâne ve teslîm ol dahi yedimden istidâne ve kabz eyledikden sonra müteveffâ-yı mezbûr bi’d-defe‘ât meblağ-ı mezbûrun üç yüz guruşunu bana teslîm ben dahi ahz u kabz edip zimmetinde dokuz yüz guruş hakkım bâkī kalmağla terekesinden taleb ederim suâl olunup alıverilmesi matlûbumdur dedikde gıbbe’s-suâl ve’l-inkâr müdde‘iye-i mezbûreden ber-vech-i muharrer müdde‘âsına beyyine taleb olundukda udûl-i ahrâr-ı ricâl-i Müslimînden olup mahmiye-i İstanbul’da Sancakdâr Hayreddin mahallesinde Mahmud Çelebi b. Ali ve Ahırkapı kurbünde Akbıyık mahallesinde sâkin İbrahim Çelebi b. Abdullah ve medîne-i Üsküdar’da Davud Paşa mahallesinde sâkin Mustafa b. el-Hâc Mehmed ve medîne-i hazret-i Eyüb’de Davud Ağa mahallesinde sâkin el-Hâc Mustafa b. el-Hâc İbrahim nâm kimesneler li-ecli’ş-şehâde meclis-i ma‘kūd-u mezkûra hâzırûn olup isre’l-istişhâd fi’l-hakīka müteveffâ-yı mezbûr Ali Efendi b. Osman b. Abdullah târîh-i kitâbdan bir sene mukaddem hâl-i hayâtında ve kemâl-i akl-ı sıhhatinde bizim huzûrumuzda mezbûr Havva Hatun cihet-i karz-ı şer‘î olmak üzere mâlından bin iki yüz guruş idâne ve teslîm ol dahi istidâne ve kabz eyledi biz bu husûsa bu vech üzere şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle oldukda müdde‘iye-i mezbûre Havva Hatun kabzına mu‘terif olduğu üç yüz guruşdan mâ‘adâ meblağ-ı bâkī-i mezbûr dokuz yüz guruşu dahi mezbûrun hayâtında medyûnu külliyen ve ba‘zan ahz u kabz ve hibe ve yâhûd dahi havâle etmeyip ve’l-hâsıl turuk-ı şer‘iyyeden bir tarîk zimmetini ibrâ etmediğine mezbûr Havva Hatun’a yemîn teklîf olundukda ol dahi alâ-vefkı’l-mes’ûl yemîn bi’llâhi’l-aliyyi’l-a‘lâ etmeğin mûcebiyle ba‘de’l-hükm mâ-vaka‘a bi’t-taleb ketbolundu. Fi’l-yevmi’s-sâlis min-Zilhicceti’ş-şerîfe li-sene tis‘a ve ışrîn ve mi’e ve elf Şâhidûn-ı sâbıkūn.