Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 70 Hüküm no: 35 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hasan Ağa oğlu Ali Ağa’ya ait Yahudihanenin mirasçıları arasında paylaşılması Husûs-ı âti’l-beyânın mahallinde ketb ü tahrîri iltimâs olunmağın bu fakīr medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Kiremitçibaşı mahallesinde sâkin iken bundan akdem vefât eden Ali Ağa b. el-merhûm Hasan Ağa’nın ile’l-vefât menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî ettikde müteveffâ-yı mezbûr Ali Ağa’nın verâseti zevce-i menkûha-i metrûkesi Emetullah bt. İbrahim nâm sagīre ile li-eb kız karındaşı Âişe Hatun ve usubet-i nesebiyye cihetinden verâseti olup Rumeli’nde medîne-i Bosna’da sâkin gāib ani’l-meclis Mehmed Ağa b. Ebubekir nâm kimesneye münhasıra ve tashîh-i mes’elesi dört sehimden olup sihâm-ı mezbûrdan bir sehmi zevcesi sagīre-i mezbûre Emetullah’a ve iki sehmi kız karındaşı mezbûre Âişe Hatun ve bir sehmi gāib-i mezbûr Mehmed Ağa’ya isâbeti tahakkukundan sonra zâtı İsmail Çelebi b. Abdullah ve Ömer Çelebi b. Abdurrahman’ın ta‘rîfleriyle mu‘arrefe olan mezbûre Âişe Hatun meclis-i şer‘-i şerîf-i enverde müteveffâ-yı mezbûrun zevcesi sagīre-i mezbûre Emetullah’ın babası ve tesviye-i umûruna bâ-hüccet-i şer‘iyye kıbel-i şer‘den mansûbe vasîsi olan işbu râfi‘u’l-kitâb [11a] karındaşım müteveffâ-yı mezbûrun Ali Ağa’nın terekesinden olup mahmiye-i İstanbul’da Balıkpazarı kapı hâricinde vâki‘ arsasının mahrûse-i Edirne’de Ali Paşa-yı cedîd vakfına beher şehr yüz ellişer akçe mukāta‘a-i kadîmesi olup üzerinde olan ebniyesi mülk olmağla lede’l-ahâlî ve’l-cîrân ma‘lûmü’l-hudûd ve’l-müştemilât Yahûdihânenin tashîh-i mezbûr üzerine iki sehmi benim ve bir sehmi dahi gāib-i mezbûr Mehmed Ağa’nın olup bâkī bir sehmi sagīre-i mezbûre Emetullah’ın mülk-i mevrûsudur zikrolunan Yahûdihânede benim iki sehm hisse-i irsiyyemden gayri kat‘â alâka ve medhalim kal[ma]mışdır dedikde gıbbe’t-tasdîki’l-mu‘teber mâ-vaka‘a bi’t-taleb ketbolundu. Fi’l-yevmi’l-hâmis ve’l-ışrîn min-Zilka‘deti’ş-şerîfe li-sene tis‘a ve ışrîn ve mi’e ve elf Şuhûdü’l-hâl: Hüseyin Ağa b. Ahmed, İsmail Efendi b. Hacı Osman, İsmail Beşe b. Abdullah, el-Hâc İbrahim b. Ahmed, Hüseyin Çelebi b. Hasan, Mustafa Ağa b. Mehmed, Ahmed Efendi b. Mustafa, Mustafa Efendi b. Ahmed.