Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 71 Hüküm no: 36 Orijinal metin no: [11a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avusturya asıllı kölenin azad edilmesi Husûs-ı âti’l-beyânın mahallinde istimâ‘ ve tahrîri iltimâs olunmağın bu fakīr hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Takyecibaşı mahallesinde sâkin iken bundan akdem vefât eden Tersâne-i âmirede mahzen kâtibi Ali Efendi b. Osman’ın ile’l-vefât sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî ettikde rıkkına inkıyâdını mu‘terife işbu uzun boylu kara gözlü açık kaşlı Nemçetü’l-asl Müslimetü’l-millet râfi‘atü’l-vesîka Safiye bt. Abdullah meclis-i ma‘kūd-ı mezkûrda müteveffâ-yı mezbûrun verâseti zevce-i menkûha-i metrûkesi Havva Hatun bt. El-Hâc Osman ile li-ebeveyn kız karındaşı Hadice Hatun ve sulbiye sagīre kızı Hanife’ye münhasıra olduğu şer‘an zâhir ve müte‘ayyin oldukdan sonra sagīre-i mezbûrenin vâlidesi ve tesviye-i umûruna kıbel-i [şer‘den] mansûbe vasiyesi olan mezbûre Havva ve Hadice hâtunlar mahzarlarında üzerine da‘vâ ve takrîr-i kelâm edip müteveffâ-yı mezbûr Ali Efendi b. Osman b. Abdullah yedinde câriye-i memlûkesi olup hâl-i hayâtında ve kemâl-i akl-ı sıhhatinde fevtinden altı ay mukaddem huzûr-ı Müslimînde hasbeten lillâhi te‘âlâ mâlından âzâd ve mülkünden ihrâc eyleyip halayık-ı hürre olmuşiken mezbûretân Havva ve Hadice hâtunlar bana müteveffâ-yı mezbûrun terekesinden olmak zu‘muyla bi-gayr-ı hakkın vaz‘-ı yed ederler suâl olunup mezbûretânın benden kasr-ı yedleri ve sebîlim tahliye olunmak matlûbumdur dedikde gıbbe’s-suâl mezbûretân Havva ve Hadice hâtunlar cevâblarında fi’l-vâki‘ mevsûfe-i mezbûre Safiye’yi müteveffâ-yı mezbûrun terekesinden olmak üzere vaz‘-ı yedlerini ikrâr lâkin âzâd olduğunu inkâr idicek [11b] mevsûfe-i mezbûre Safiye’den beyyine taleb olundukda udûl-i ahrâr-ı ricâl-i Müslimînden olup medîne-i mezbûrede Cezerî Kasımpaşa mahallesinde sâkin Ali Çelebi b. Veli ve mahmiye-i İstanbul’da Ahırkapı kurbünde Akbıyık mahallesinde sâkin İbrahim Çelebi b. Abdullah nâm kimesneler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr mahzen kâtibi Ali Efendi b. Osman b. Abdullah işbu mevsûfe-i mezbûre Safiye yedinde câriye-i memlûkesi olup hâl-i hayâtında ve kemâl-i akl-ı sıhhatinde fevtinden altı ay mukaddem bizim huzûrumuzda hasbeten lillâhi te‘âlâ mâlından âzâd ve mülkünden ihrâc eyledi [biz] bu vech üzere şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mezbûretân Havva ve Hadice hâtunlar mevsûfe-i mezbûre Safiye’den kasr-ı yedlerine ve sebîle-i tahliyesine (…) mâ-vaka‘a bi’t-taleb ketbolundu. Fi’l-yevmi’s-sâlis min-Zilhicceti’ş-şerîfe li-sene tis‘a ve ışrîn ve mi’e ve elf Şuhûdü’l-hâl: Ahmed Çelebi b. Hüseyin, Mustafa Çelebi b. Hasan, Ali Çelebi b. Veli, Veli Efendi b. Ali, Süleyman Efendi b. Mehmed, Mehmed Efendi b. Yusuf el-imâm, İbrahim Efendi b. Osman, Derviş Hasan b. Muharrem, es-Seyyid Süleyman Çelebi b. Mehmed, es-Seyyid Ali b. Hasan