Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 72 Hüküm no: 37 Orijinal metin no: [11b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ahmed kızı Fatıma’nın çocuklarına vasi tayini Medîne-i hazret-i Ebâ Eyyüb el-Ensârî -radıye anhu Rabbühü’l-Bârî- mahallâtından Evlice Baba mahallesinde sâkine iken bundan akdem vefât eden Fâtıma bt. Ahmed nâm hâtunun sadrî sagīr oğlu İsmail b. Mehmed ile ve sadriye sagīre kızı Ümmühan bt. Süleyman’ın emrlerine kıbel-i şer‘den bir vasî nasbı lâzım ve mühim olmağın emânet ile ma‘rûf ve diyânet ile mevsûf ve her vechile vesâyet uhdesinden gelmeğe kādir idiği zeyl-i vesîkada muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olmağın sagīr-i mezbûr İsmail’in babası işbu sāhibü’l-kitâb mezbûr Mehmed b. Himmet nâm kimesneyi hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīrân-ı mezbûrânın vakt-i rüşd-i sedâdlarına değin tesviye-i emrlerine vasî nasb ve ta‘yîn buyurduklarında ol dahi vesâyet-i mezbûru kabûl ve merâsimini edâya ta‘ahhüd ve iltizâm etmeğin mâ-vaka‘a bi’t-taleb ketbolundu. Fi’l-yevmi’l-hâmis aşer min-Zilhicceti’ş-şerîfe li-sene tis‘a ve ışrîn ve mi’e ve elf Şuhûdü’l-hâl: Hüseyin Çelebi b. el-Hâc Mustafa, Ali Beşe b. Mustafa, Berber Mehmed Çelebi b. Hızır, Ömer Çelebi b. Mustafa, Osman Çelebi b. Mustafa, Muhsin Çelebi b. Mustafa, Ketenci Mehmed Çelebi b. el-Hâc Mustafa, Aşçı Hasan Çelebi b. Abdülmennan, Mehmed Efendi b. Ahmed, Osman Çelebi b. Mustafa.