Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 73 Hüküm no: 39 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin oğlu Hamâmi Ali Ağa’nın terekesinden eşinin mehr-i müeccelini talebi Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi Havâss-ı Refî‘a kazâsı muzâfâtından Çekmece-i Kebîri kasabasında vâki‘ Dizdâriye mahallesinde sâkin iken bundan akdem vefât eden Hamâmî Ali Ağa b. Hüseyin b. Hasan’ın hayâtında sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî ettikde müteveffâ-yı mezbûrun zevce-i menkûha-i metrûkesi olup zâtı Abdullah b. Abdullah ve Bektaş b. Mehmed ta‘rîfleriyle mu‘arrefe olan işbu râfi‘atü’l-kitâb Ümmü Gülsüm nâm hatun bt. Abdüllatif meclis-i ma‘kūd-ı mezkûrda müteveffâ-yı mezbûrun bâ-hüccet-i şer‘iyye vasiyy-i muhtârı olmağla terekesine bi’l-vesâye vâzı‘u’l-yed olan Süleyman Ağa b. Hasan mahzarında üzerine da‘vâ ve takrîr-i kelâm edip zevcim müteveffâ-yı mezbûr Hamâmî Ali Ağa b. Hüseyin b. Hasan zimmetinde mütekarrir ve ma‘kūdün aleyh altı bin akçe mehr hakkım olup hattâ müteveffâ-yı mezbûr hâl-i hayâtında zimmetinde ol kadar mehr-i müeccel deyni olduğu ikrâr ve işhâd dahi edip meblağ-ı mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup karye-i mezbûre sâkinlerinden müteveffâ-yı mezbûrân Abdullah ve Bektaş nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Hamâmî Ali Ağa b. Hüseyin b. Hasan hâl-i hayâtında işbu müdde‘iye-i mezbûre Ümmü Gülsüm Hatun’a zimmetinde mukarrer ve ma‘kūdün aleyh altı bin akçe mehr-i müeccel deyni olduğunu ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘de ma‘an ba‘s olunan Ali Çelebi b. Abdulbâki ve es-Seyyid Mustafa b. Sefer ile meclis-i şer‘a gelip her biri alâ-vukū‘ihi inhâ ve takrîr-i kelâm etmeğin mâ-vaka‘a bi’t-taleb ketbolundu Fi’l-yevmi’l-hâdî ve’l-ışrîn min-Cemâziyelâhir li-sene tis‘a ve ışrîn ve mi’e ve elf Şuhûdü’l-hâl: Mustafa Efendi b. Abdullah, Ca‘fer Ağa b. Abdullah, Mehmed Çelebi b. Hızır, Ali Çelebi, Mehmed Beşe b. Abdullah.