Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 74 Hüküm no: 40 Orijinal metin no: [12b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühan isimli kadının sürgün edilmesi Yâ Fettâh Yâ Rezzâk Sah Eyüb Kassâmı Efendi Şer‘le Görüp İ‘lâm eyleye Deyu Buyuruldu Devletlü ve Sa‘âdetlü Sultânım Hazretleri Sağ olsun Bu kulları hazret-i Eyüb’de merhûm Hasan Ağa’nın yetim oğlu Ali’nin vâsî-i muhtârı olup merhûm bu kullarına ve bütün mahallesi imâmı ve cemâ‘atine emânet edip cümlesi hasbeten lillâhi te‘âlâ nâzırlar olup yine hâneleri ekdilerinden Ümmühan nâm avrat eytâm-ı mezbûru Üsküdar’a ve İslambol’a getirip ve karındaşı oğlu Mustafa ile şerbetçi ve kebâbçı dükkânlarına getirdiğinden mâ‘adâ kendisi harc ve masrafın görüp esbâbları var iken merrât-ı kebîr hemşîresinden bilâ-izn-i şer‘î izdiyâd bahâ ile esbâb alıverüp ve yetim-i mezbûrun hânesine nâ-mahrem adam getirip geceledip ve her zamân İstanbul’da kapı kapı sokak sokak gezdirip yetim-i mezbûra külli gadr etmeğin sultânım hazretlerinin merâhim-i aliyyelerinden mercûdur ki hazret-i Eyüb kassâmı efendi huzûrunda mürâfa‘a-i şer‘î olunup vâsisi ve mahallesi imâmı ve cemâ‘atinden suâl olunup mezbûr Ümmühân’ın sâkin olduğu eytâm-ı mezbûrun hânesi olup her vechile zararı olduğu huzûr-ı âlîlerine i‘lâm olunup mahallesi imâmı ma‘rifetiyle hâne-i eytâmdan ihrâc olunması bâbında emr ü fermân sultânım hazretlerinindir. Bende Vâsî Ve ahâlî-i mahalle-i m[ezbûr].