Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 87 Hüküm no: 51 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şahin Odabaşı kızı Ayşe’nin terekesinden kalan mülkün annesi Ümmü Gülsüm Hatun’a devri Medîne-i hazret-i Ebâ Eyyüb el-Ensârî -radıye anhu Rabbühü’l-Bârî-’de Câmi‘ mahallesinde sâkin iken bundan akdem vefât eden Şahin Odabaşı b. Abdullah b. Abdurrahman’ın verâseti sulbî sagīr oğlu Mustafa ile sulbiye sagīre kızı Âişe’ye münhasıra ve tashîh-i mes’elesi dört sehimden olup sihâm-ı mezbûreden iki sehmi sagīr-i mezbûr Mustafa’ya ve bir sehmi sagīre kızı Fâtıma’ya ve bir sehmi kebîre kızı Âişe’ye isâbeti tahakkukundan sonra mahalle-i mezbûrede vâki‘ lede’l-ahâlî ve’l-cîrân ve’l-müştemilât menzil yedlerinde mülk-i mûrisleri olup mutasarrıflar iken mezbûre Âişe dahi bundan akdem vefât edip verâseti zevc-i metrûku Mustafa Bey b. Receb ile vâlidesi Ümmü Gülsüm bt. Abdullah ve li-ebeveyn er karındaşı Mustafa ve li-ebeveyn kız karındaşı Fâtıma nâm sagīrlere münhasıra olup ve tashîh-i mes’elesi otuz altı sehimden olup sihâm-ı mezbûrdan dokuz sehmi zevc-i mezbûr Mustafa Bey’e ve altı sehmi vâlidesi mezbûre Ümmü Gülsüm’e ve on dört sehmi karındaşı mezbûr Mustafa’ya ve yedi sehmi kız karındaşı mezbûre Fâtıma’ya isâbeti tahakkukundan sonra mezbûr Mustafa Bey’e zevce-i menkûhası müteveffât-ı mezbûrdan bi’l-irs-i şer‘î isâbet ve intikāl eden dokuz sehm hissesini kayın vâlidesi mezbûre Ümmü Gülsüm’e bâ-hüccet-i şer‘iyye yetmiş guruşa bey‘ ve temlîk ve teslîm ol dahi minvâl-i muharrer iştirâ ve temellük ve tesellüm eyledikden sonra semeni olan mezbûru mezbûr Ümmü Gülsüm yedinden ahz u kabz edip mezbûre Ümmü Gülsüm menzil-i mezbûrdan altı sehmine irsen ve dokuz sehmine şirâen mâlik oldukdan sonra yine mahalle-i mezbûre sâkinlerinden mezbûre Fâtıma tarafından husûs-ı âti’l-beyânı vekîli olduğu zât-ı mezbûre [bi’l-ma‘rife]ti’ş-şer‘iyye ârifân el-Hâc Ali Efendi b. Receb ve Mehmed Çelebi b. Hüseyin nâm kimesneler şehâdetleriyle şer‘an sâbit ve sübût-ı vekâlete hükm-i şer‘î lâhık olan Mustafa Çelebi b. Mehmed nâm kimesne meclis-i şer‘-i hatîr-i lâzımü’t-tevkīrde müvekkilesi mezbûrenin vâlidesi işbu sâhibetü’l-kitâb Ümmü Gülsüm bt. Abdullah nâm hatun mahzarında ikrâr ve takrîr-i kelâm edip müvekkilem mezbûrenin yedinde mülk-i mevr[û]su olup mahalle-i mezbûrede vâki‘ bir tarafı ba‘zan Şatır Halil Çelebi ve ba‘zan Mehmed Çelebi mülkü ve bir tarafı Abdi Çavuş bahçesi ve bir tarafı [18a] tarîk-ı hâs ve bir tarafı tarîk-ı âm ile mahdûd tabaka-i ulyâsında nîm sofalı bir bâb oda ve dehlîz ve tahta-pûş ve matbah ve vustâsında bir bâb oda ve dehlîz ve bir kenîf ve bi’r-i mâ ve bahçeyi müştemil menzilde olan babası müteveffâ-yı mezbûrdan isâbet eden rub‘ sehm hissesini ve kız karındaşı müteveffât-ı mezbûre Âişe’den bi’l-irsi’ş-şer‘î isâbet eden yedi sehm hissesini müvekkilem mezbûrenin vâlidesi mezbûre Ümmü Gülsüm Hatun’a cihet-i deyn-i şer‘îden olmak üzere yüz guruş deyni olup meblağ-ı mezbûr yüz guruş mukābelesinde hisse-i şâyi‘asını takās edip ol dahi mukāsa ve kabûl etmeğin mezbûr Ümmü Gülsüm menzil-i mezbûrun altı sehmine irsen ve dokuz sehmine mezbûr Mustafa Bey’den şirâen ve menzil-i mezbûrun rub‘ hissesine ve yedi sehmine müvekkilem mezbûrdan şirâen mâlik olup müvekkilem mezbûrenin aslen sihâm-ı mezbûrede alâka ve medhali kalmayıp vâlidesi mezbûrenin mülk-i müşterâsıdır keyfemâ-teşâ ve tahtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketbolundu. Fi’l-yevmi’l-hâmis min-Zilhicceti’ş-şerîfe li-sene tis‘a ve ışrîn ve mi’e ve elf. Şuhûdü’l-hâl: Celeb Hasan Çelebi b. Abdülmennan, Molla Mehmed b. Ali Efendi, Hüseyin Çelebi b. Mehmed, es-Seyyid Mustafa Çelebi b. Sefer, Mehmed Çelebi b. Hüseyin Efendi, es-Seyyid Abdurrahman b. Receb, Berber Osman b. Halil, Ahmed Çelebi b. Abdullah ve gayruhüm.