Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 98 Hüküm no: 57 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah oğlu Mahmud’un mirasından zevcesinin mehr-i müeccelini talebi Husûs-ı âti’l-beyânın mahallinde istimâ‘ ve tahrîr için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebâ Eyyüb el-Ensârî mahallâtından Baba Haydar Nakşibendî mahallesinde sâkin iken bundan akdem vefât eden Mahmud Çelebi b. Abdullah’ın ile’l-vefât sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî [ettikde] müteveffâ-yı mezbûrun zevce-i menkûha-i metrûkesi olup zâtı Hüseyin Çelebi b. İvaz [ve] el-Hâc Mustafa b. Sefer ta‘rîfleriyle mu‘arrefe olan işbu râfi‘atü’l-kitâb Saliha Hatun bt. Abdullah meclis-i ma‘kūd-ı mezkûrda tashîhi li’d-da‘vâ vasî nasb olunan Mustafa Çelebi b. Ali mahzarında üzerine da‘vâ ve takrîr-i kelâm edip zevcim müteveffâ-yı mezbûr Mahmud Çelebi b. Abdullah b. Abdurrahman fevtinden on altı sene mukaddem beni huzûr-ı Müslimînde üç bin akçe mehr-i müeccel tesmiyesiyle tezevvüc-i def‘a edip akd-i nikâh beynimizde kâim iken meblağ-ı mezbûru kable’l-edâ fevt olup terekesinden taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden olup mahalle-i mezbûre sâkin[ler]inden mu‘arrefân-ı mezbûrân Hüseyin Çelebi b. İvaz [ve] el-Hâc Mustafa b. Sefer nâm kimesneler li-ecli’ş-şehâde meclis-i ma‘kūd-ı mezkûrda hâzırân olup isre’l-istişhâd fi’l-hakīka müteveffâ-yı mezbûr Mahmud Çelebi b. Abdullah b. Abdurrahman fevtinden on altı sene mukaddem üç bin akçe mehr-i müeccel tesmiyesiyle işbu müdde‘iye-i mezbûre Saliha Hatun’u bizim huzûrumuzda tezevvüc ve kabûl edip akd-i nikâh beynlerinde kāim iken vefât eyledi biz bu husûsa bu vech üzere şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘de ma‘an ba‘s olunan Çukadâr Ali Çelebi b. Abdulbâki ve Muhzır es-Seyyid Mustafa b. Sefer Efendi ile meclis-i şer‘a gelip her biri alâ-vukū‘ihi inhâ ve takrîr etmeğin mâ-vaka‘a bi’t-taleb ketbolundu. Fi’l-yevmi’s-sânî min-Ramazâni’l-mübârek li-sene tis‘a ve ışrîn ve mi’e ve elf. Şuhûdü’l-hâl: Es-Seyyid Ahmed b. Davud, es-Seyyid Mehmed b. Davud, es-Seyyid Süleyman b. es-Seyyid Mehmed, Mustafa Çelebi b. Ali.