Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 97 Hüküm no: 56 Orijinal metin no: [21a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Abdullah oğlu Mahmud Çelebi’nin çocuklarına nafaka tayini Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Baba Haydar Nakşibendî mahallesinde sâkin iken bundan akdem vefât eden Mahmud Çelebi b. Abdullah’ın sulbî sagīr oğlu Süleyman ve sulbiye sagīre kızı Âişe’nin tesviye-i emrlerine kıbel-i şer‘den mansûbe vasîleri vâlideleri olan işbu râfi‘atü’l-kitâb Saliha Hatun bt. Abdullah meclis-i şer‘-i şerîf-i enverde takrîr-i kelâm ve ta‘bîr ani’l-merâm edip vasîleri olduğum sagīrân-ı mezbûrânın nafaka ve kisve bahâya eşedd-i ihtiyâcları olmağla babalarından müntakil mâllarından her birine kadr-i ma‘rûf nafaka ve kisve bahâ farz ve takdîr olunmak bi’l-vesâye matlûbumdur dedikde vasiyye-i mezbûrenin kelimât-ı meşrûhası vâkı‘a mutâbıka idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīrân-ı [21b] mezbûrânın babalarından müntakil mâllarından her birine kadr-i ma‘rûf yevmî beşer akçe nafaka ve kisve bahâ farz ve takdîr buyurup meblağ-ı mefrûz-ı mezbûru sagīrân-ı mezbûrân Süleyman ve Âişe’nin nafaka ve kisve bahâlarına harc ve sarfa ve lede’l-iktizâ istidâneye ve inde’z-zafer mâllarına rücû‘a vasiyye-i mezbûreye izin birle mâ-vaka‘a bi’t-taleb ketbolundu. Fi’l-yevmi’s-sânî min-Ramazâni şerîfi’l-mübârek li-sene tis‘a ve ışrîn ve mi’e ve elf. Şuhûdü’l-hâl: Es-Seyyid Ahmed Çelebi b. Davud, es-Seyyid Mehmed Çelebi b. Davud, Hüseyin Beşe b. İvaz, el-Hâc Mustafa b. Sefer, Mustafa b. Ali.